Abrill!

Guder Daag Blog Leser! Well, nau sin mir in Abrill…so en scheener Munet. Ich hab en arrig gudes Gedicht iwwer Abrill gefunne un will es mit eich deele. Do iss “Abrill” vun dem Edwin Gehman Weber (1904-1995)!

Der Winder iss verbei 
Daheem uff de alt Bauerei.
Es Friehyaahr iss nau do –
Die Zaahschlipper un Amschle sin froh.

Der fuffzeht Abrill
Peift der Wipperwill.
Mir bleiwe daheem vun de Schul,
Misse schaffe wie en Fool. 

Schtee lese, Mischt faahre, bluge –
Gaar ken Zeit fer Ruhe.
Fer Hawwer saehe iss es hoch Zeit,
Net abschiewe was duh kannscht heit.

No iss Fens weissle un Gaarde rummache
Un Arebse blanse un so Sache
Wie Zwiwwle un Schpinaat
Un Reddich un Gaarde-Selaat.

Alle Mariye bischt du wacker frieh,
Wann der Haahne graeht sei Gickerigie!
Un die Ginnis un Gens un die Sei
Sin am beddle fer gfiedert sei.

Zieht die Hosse aa un geht dazu naus,
Brauchscht kee Schuh im Haus odder draus –
Uff de Bauerei braucht niemand Schuh –
Net der Hund, net Sau, net die Kuh!

Wann du Schuh hawwe musscht, bischt in Schteil,
So wie die schlotze Geil,
Ihr Kepp iwwer alles draus!
Wann so sei muss, dann macht’s nix aus.

Abrill iss en scheene Zeit
Mit Regge un Sunneschein dadrin.
Die Oschderblumme un Dullebaahne bliehe –
Die Aerd dreht vun brau zu grieh. 

Do iss en Audio Klip: