Guder Daag Blog Leser! Well, nau sin mir in November un sell mehnt ass Danksfescht kummt. Des Mol hawwich en katzes Gedicht gschriwwe. Do kummt glee bissel “Free Form” Deitsch!
Danksfescht
Frieh am Mariye, aus em Bett tschumpe, in die Kich geh,
es Welschhinkel aus em Keller griege, in die Rooschdepann nei duh.
Offe aadrehe…uffwarme…Welschhinkel neiduh, Offedier zumache.
Mariyeschtick esse, awwer net viel…es gude Esse kummt um zwelf Uhr.
Zwette Koppche Kaffi drinke. Myusick aadrehe.
Gummbiere schaele, Selleri un Zwiwwel glee schneide: alles in en Haffe duh…koche losse.
Gedrickelte Welschkann griege un mit Wasser in en Haffe neischidde…koche losse.
Dritte Koppche Kafii drinke.
Offedier uffmache, uff es Welschhinkel gucke…reihe mit Brieh. Deckel an, Offedier zu.
Der Disch decke, Deller, Gawwle, Messer, Leffle raushole.
Meh Schtiehl vun en annere Schtubb hole.
Die Kich iss voll mit Geruche…mir kenne es schier gaar schmacke.
Grummbiere verdricke, Brot, Budder, Millich, Sals un Peffer neiduh…Filse iss reddi.
Braunzucker, Budder, Millich in de Gedrickelte Welschkann mixe…Welschkann iss reddi.
Dunkes koche. Welschhinkel aus re Offe bringe, hocke losse.
Brot uffwarme losse. Welschhinkel schneide. Alles uff dem Disch schtelle.
“Zeit zu esse, alles iss uff dem Disch, nau kumm’ mol Buwe!” greische.
Die Freindschaft versammele sich un hocke sich hie.
En grosse un hatzvolle Gebet gewwe.
“Nau schlag nei!” saage.
Esse, Schmunsle, Lache, Gschichte verzaehle.
Dankbar sei.
Do iss en Audio Klip:
PA Dutch 101 
Hallo ehr liewe Leit,
Ich hann grad im Internet eier Seit gsieh unn hann mich arisch gfreit das zu lese.
Ich kumm aus de Weschdpalz, genauer aussem Nordpälzer Berschland (Kusel)!
Machend weider so, unn ich frei mich schunn was neies funn eich zu lese!