Diesember 2020
Liewer Belsnickel,
Wie bischt? Ich hoff ass des Brief dir gut un gsund findt. Was fer en Yaahr 2020 iss, gell? Ich bin froh ass es ball vorbei iss! Ich waar arrig gut des Yaahr. Ich hab allsfatt mei Mask aaghatt un ich glaab ich hab mei Hend fimf Mol yeder Daag gewesche. Ich hab mei Noochber geholfe ihre Grummbiere rauszuroppe. Ich hab mei Fraa yede Woch geholfe es Haus zu butze un ich hab aa mei Gleeder yedes Woch zammegelegt wann sie faddich in die Wesch waare. Ich hab so viel Deitsch wie meeglich mit mei Kinner gschwetzt un ich hab sie viel deitsches Esse gekocht. Ich waar warricklich en arrig guder Bu gewest.
Kummscht du zu unsrem Haus des Yaahr? Ich hoff so, awwer ich verschteh ganz gut wann du NEE saagscht weeich es COVID. Vielleicht kannscht du yuscht zu unserem Bortsch kumme un datt mit uns schwetze? Mir kenne darrich die Mickedier schwetze! Dann kenne mir uns Social Distancing duhne. Ich glaab es kann hatt sei fer dich en Mask zu waere…dei Baart iss so lang un schtruwwelich. Ich hab en grosse Eemer voll mit Hand Sanitizer uff de Bortsch wann du vorbeikummscht. Du kannscht dich gut schmiere wann du witt.
Des Yaahr frooge ich un mei Kinner fer nix. Mir brauche nix. Die Kinner hen genunk Schpieldinge. Awwer mir gleiche mit dir zu bsuche un Zeit mir dir rumbringe, so sei so gut un kumm mol. Wie yedes anneres Yaahr will ich en gleene Glaas mit Appeljack fer dich hawwe, un mei Fraa waerd aa frische Kuchli dobeihawwe.
Ich hoff mir sehne uns ball!
Hallicher Grischtdaag un bleib gsund!
Mach’s gut,
Der Doug
Do iss en Audio Klip:
PA Dutch 101 
Harrlich!
liewer Freind Douglas, den Brief an de Belsnickel hoschde arrig guud geschriwwe! Bei uns kummt yo heit Nacht de liewe guure Heilige Nikolaus 🎅🏽! Ich hab aach schun moi Stiefel enaus vor die Hausdier gschdellt und glaab feschd dro, dass er mir heit Nacht die schee mit Gutsjer un Schokolad fille duht! Wann er net gsehe hot, dass ich brav war, doann kimmt der Belsnickel 🧙♂️ zu mer mit de Rute 🤭oh weh! Gruß an Euch Alle, Mach’s Gud und bleibt gsund! Herbert