Guder Daag Blog Leser! Des Woch waar Danksfescht un nadierlich hawwich arrig gut gesse. Des Yaahr hawwich fer mei Freindschaft gekocht. Alles waar frisch un nadierlich gut! Es waar 11 Leit um mei Disch rum am hocke un ‘s waar so viel verschiddliche Schissle un Deller voll mit gude Esse. Die Leit hen gut geduh un hen viel gesse awwer trotz hot es Iwwerichs gewwe. Es gebt allsfatt Iwwerichs.
Awwer wisst dihr was? Oft sin Iwwerichs besser ass wann sie frisch sin. Denkt dihr aa so? Manniche Ess-sache sin so meh Gschmackhaft uff de zwette Daag. Mei gedrickelte Welschkann zum Beischpiel. Ich lieb es uff Danksfescht zu esse, awwer noch en Owed in em Eisbax schmeckt es nooch besser. Fer was iss es so? Ich weess net. Was ich aa ass Iwwerichs arrig glieche iss Seimaage. Seimaage Iwwerichs gleich ich ass Mariyeschtick Hash zu mache. In glee bissel Budder brode…..aye yummer iss des gut! Ich find aa oft as Supp besser ee paar Daage schpeeder schmeckt. Bot Boi iss so appeditlich uff de zwette odder dritte Daag.
Zum Glick des Yaahr hawwich viel Iwwerichs vun Danksfescht. So ich kann noch gut esse un es gebt mir aa die Gelegeheit nooch mals Dank zu gewwe.
Was denkt dihr? Gleicht dihr aa Iwwerichs? Ich kenn viel Leit die Iwwerichs net gleicht. Awwer fer mich un mei Haus, bring mol die Iwwerichs, ich ess sie fer schurr!
Do iss en Audio Clip:
PA Dutch 101 
Bei uns do hiwwe in den Pfalz isch es genau e so. Mir saachen: Uffgewärmt schmeckts nochemool so gut! Bsunners isch des so bei Supp, Eintopf un Sooße. En guude Appeditt – ach jetzt iwwer die Feierdääch – winsch ich eich iwwer de Atlandik! Ich hoff, er verstehn mei Art vunn Pfälzisch – es isch doch e bissel annerscht wie eiers in PA.