Mach’s gut 2019! Guder Daag 2020!

Guder Daag liewe Blog Leser un Leit in YouTube Land! Well es Yaahr iss widder rum un es iss Zeit fer mich en Grischtdaag un Nei Yaahr Video zu mache. Es fiehlt sich as ich letschdem Yaahr sei Video graad gemacht hab, awwer nee, zwelf Munet sin schunn vorbeigange.

So loss mich mit en katze Rickguck uff ee paar Dinge aafange, die im Yaahr 2019 gschehe sin. 

In Hanning, der Punxsatawny Phil die Grundsau hot sei Schadde net gsehne…Friehyaahr kummt ball! Der Bresident Trump hot zum zwette Mol mit dem Kim Jong-Un aus Naddkorea gedroffe. Sie hen browiert Fried zu finne, awwer leider iss widder nix rauskumme. 

In Matz hot es widder en grosse Schiesserei gewwe, des Mol waar es in Nei Zealand. 51 Leit sin gschtarewe un 50 Leit waare verletzt. Disney hot 21st Century Fox kaaft, nau sin der Mickey Maus un sei Freinde de greeschte Entertainment Kumpani in re Welt.   Der Mueller Report iss rauskumme un Amerikaa hot net gewusst was zu denke…mir schwetze noch iwwer was drin waar. 

In Abrill iss en grosse Feier in die gut bekannte Kaerrich Notre Dame in Paris ausgebroche. Der Kaiser vun Yapan, Akihito hot uffgewwe. Der neie Kaiser heesst Naruhito. 

In Tschunn waar die FIFA Welt Koppche fer die Weibsleit in Frankreich. Die Amerikaanern hen gut gschpielt un am End waare die Champions! In Tschulei hot die NOAA gsaat ass Tschulei 2019 waar die heesschdes Munet in re Gshicht. Es letschde Volkswagen Beetle iss gemacht. Der Boris Johnson iss ass neier Prime Minister vun de UK gschtimmt. 

In Aagscht hot es widder en Schiesserei gewwe, des mol in en Walmart in Texas. 22 Leit sin erschosse un 27 waare verletzt. Ee Daag schpeeder waar en Schiesserei in Dayton, Ohio, un 10 meh Leit sin erschosse. 

In September hot der grosse Hurricane Dorian die Bahamas gedroffe mit 185 MPH Winde! Die Nancy Pelosi un die Demokraate hen bekannt gemacht ass Formal Impeachment Inquiry gege Bresident Trump waerre aasetze.  In Oktower iss der Fiehrer vun ISIS, Abu Bakr al-Baghdadi iss vun Amerikannische Soldaate dodgemacht.  

Viel bekannte un wichtige Leit sin im 2019 gschtarewe: Carol Channing, Doris Day, Tim Conway, Lee Iacocca, Ross Perot, Toni Morrison, un Peter Fonda.

Die Vereinigte Keenichreich iss nooch am Brexit fechde, mer wisse gaar net was am End kummt! Un als ich des schreiwe, die Impeachment Proceedings sin noch am laafe. Mir wisse aa net was kummt un naegschdes Yaahr iss aa en grosse Lektion Yaahr fer uns do in Amerikaa. Waerrd der Trump widder gewinne odder kummt en Demokraat im Weisses Haus?

Fer ich un mei Familye, 2019 waar en gudes Yaahr. Mei Kinner sin gewaxe un mei Dochder schwetzt meh Deitsch yeder Daag. Die Estella iss nau in 2nd Grade. Sie hot aa aagsetzt die Geig zu schpiele. Mei Bu, der Oscar iss nau 5 Yaahre alt un iss allsfatt am danse un singe. Unser Movie, Hiwwe wie Driwwe, hot sei Premier in Deitschland in Abrill gewwe un in Tschunn waar es in Amerikaa. In Deitschland un in Amerikaa hen die Leit der Movie arrig gegliche. Mer kann en DVD im Internet kaafe bei Masthof Press. 

So nau iss die Zeit wann mer uff en abaddiches Bobbli denke. Grischtdaag iss viel meh as Gschenke, Beem mit Lichter, grosse Iems un scheene Lieder. Fer uns Grischtliche Leit, iss es en neie Aafang un der Aakumme vun unserem Herr. Unser Herr, der kummt um all unser Sinde wegzunemme. 

Mei Winsche fer eich des Yaahr sin as mir do in re Welt Fried finne kennte, as Leit die ken Haus hen, en Blatz finne kennte, as die Leit die mitaus Arewet sin, en gude Tschopp finne kennte, as die Leit die grank sin, en Antwatt zu ihre Druwwel finne kennte. As die Lenner in re Welt die in Grieg sin, en ewige Fried finne kennte. Ich weess schunn as der Belschnickel net all mei Winsche vollende kennt. Awwer ich froog ihn ennihau. 

Paersehnlich, will ich glee bissel meh saage. Sell kummt graad vun meinem Hatz: Ich bin so froh fer all die Unnerschtitzung as all mei Blog Leser, Facebook Freinde un annere Internet Freinde mich im Yaahr 2019 gewwe hen. Nadierlich waerr ich im 2020 widder neie Blog Poschts schreiwe un Videos mache. Nadierlich waerr ich so viel duhe as meeglich fer unsere scheene Schprooch zu behalde. Ich hoff as all vun eich mir mithelft.

Awwer fer nau saag ich eefach: Hallicher Grischtdaag un ich winsch eich en halliches, glickliches un gsundliches Nei Yaahr 2020. Bis Yenner, macht’s gut un schwetzt Deitsch. 

Do iss en Video Klip: Video uff mei YouTube Channel!