Brummvoggel Mischt!

Guder Daag Blog Leser! Yedes Yaahr uff dem Kutztown Folk Fescht gebt es en Liegner Fescht. Leit schteh uff un verzaehl en Gschicht (en grosse Lieg). Oft lach ich so viel weil die Liege so luschdig sin. Heit bring ich eich die Gschicht ass mei guder Freind, der Richard Savidge aus Hegins, PA, verzaehlt hot.

Brummvoggel Mischt

hummingbird-bari-rhys

Ich waar uffgezoge in Fountain, Schuylkill Kaunty, drei Meil gehe naddlich vun Interstate 81. Fountain hot 22 Heiser un mir hen die Schtross Lichter um fimf Uhr im Winder un nein Uhr im Summer reigebrocht. Mir hen en Gaarde ghatt un hen all sadde Gemies geblanzt. Ee Daag hot mei Grossdaadi, der Jonas Savidge, gfrogt was fer Fertilizer ass ich am yuuse bin. Derweil ass mer zwelf Esel ghatt hen fer Hols schleefe am Saeg Miehl, hawwich Esel Mischt gyuust. Die Tomaets waare so gross vun Esel Mischt yuuse, mir hen sie mitt der Ax abhocke misse.  Der Grossdaadi hot gsaat, “Browier Brummvoggel Mischt fer grosse Blanze zu hawwe.” Er hot gsaat fer en halwer Teeleffel voll yuuse. Es hot mich drei Yaahre genumme fer so viel Brummvoggel Mischt zamme zu griege. Ich hab es browiert uff ee Kaerbs Schtick. In en katze Zeit hawwich Kaerbs ass so gross waar ass fimf Kalls hen net um en rumm raeche kenne. Der Reading Adler iss kumme un hen Pickders genumme. Die Pickders hen 30 Pund gwoge. Es waar zu gross fer uff Drucke duh fer an der Gratz Fair zu nemme. Ich hab die Judge nuff grickt zu Fountain fer der gross Kaerbs zu judge. Ich hab zwett Breiz gewunne. En Kall drunne in Schpringville hot aagewisst vum Brummvoggel Mischt un hot en ganze Teeleffel geyuust. Er hot aerscht Breiz gewunne. Es waar Zeit fer der Kaerbs zu aernde. Mei Daadi hot gsaat ich sett der Kaerbs fescht Kette an der Kasche Baam. Ich hab der drei Vaddel Zoll dick schlaaf Kett geyuust fer es an der Baam fescht zu mache so ass es net nunner uff Route 25 rolle daet. Ich hab noh der Kett Saeg genumme un der zehe Zoll Dick Schtung abgsaegt. Der Kaerbs hot wennich gemooft un die Kett iss verrisse un es hot nunner uff Route 25 gerollt. En grosse Tractor-Trailer-Truck iss darrich runner kumme un die zwee sin zamme kumme. Die Schticke sin iwwer all im Schteddel gefloge. Sie hen gsaat ass sie die Grach drunne in Reading heere kennte! Ich weess net eb sell Wahr iss. Es hot zwee Vedderscht-End-Loaders vier Daage genumme fer die Schmier uffzubutze. Die Schticke Kaerbs waare gelaade uff Trucks un sin fatt gfaahre zu all die Beckerei im Kaunty. Schuylkille Kaunty hot Kaerbs Pei ghatt fer vier Yaahre. All dess iss vum Brummvoggel Mischt beikumme. Des iss mei Schtori un ich schtick aa dezu.

Do iss en Audio Klip:

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this:
search previous next tag category expand menu location phone mail time cart zoom edit close