Pennsylvaniensis Deitschicus

Guder Daag Blog Leser! Des Mol bring ich eppes abbaddiches.  Ass viel vun eich schunn wisst, fer yede Gedier odder Organism gebt es en biologische Beschreiwung. Ich hab gedenkt es waar Zeit fer so en Beschreiwung fer epper der Pennsylvaanisch Deitsch iss. So, ich hab een gschriwwe.

Naame: Pennsylvaanisch Deitsch (Pennsylvaniensis Deitschicus) (PD)

Bevolkering: Mir wisse net genaa awwer mir rode baut 400,000 die die Mudderschprooch noch schwetze, viel meh Leit (Millyonen) die die Mudderschprooch net schwetze awwer sin noch PD.

Habitat: die lendliche Gegend um sudd-oscht Pennsylvaania, abbadiche die Kauntys vun Barricks, Lechaa, Lebnen, un Lengschder. Aa uff die Fringes in Kauntys wie Adams, Northampton, Carbon, Schuylkill, Yarrick, Dauphin un annere. Neilich gebt es aa PD in annere Schtaadte wie Ohio, Indiana, un aa in Kanada. Normally sin sie grooss Schtedt schei un sie fiehle sich in en Schtadt net daheem.

Greess: Ass Uffgewaxene kenne PD in all Greesse kumme, vun 4 Fiess bis 6+ Fiess grooss.

Schaal: Dick un hatt.

Ambulation: Laafe wie annere Mensche (uff zwee Beh) awwer wann sie zu viel Bier odder Brandewei gedrunke hen, dann kenne sie oft glee bissel dappich sei.

Vision: Normally iss es glaar, awwer mannichmol kenne die PD fixated uff ee Ding sehne.

Gheer: die PD kenne gut heere, awwer wie ihr Vision, kenne sie aa glee wennich schniekich sei um was sie heere. Sie kenne gut heere awwer net so gut zuheere.

Rieche: die PD gleiche alles siesses un saueres. Annere Geruche die sie gleiche sin frisch gemaehte Hoi, waremes Lattwarick, un der Grund um en frisch gegraawene Grundsau ihr Loch.

Gschmack: wie Rieche, die PD gleiche siess un saueres Essen. Faule Gaardesaache wie Sauergraut gleiche sie zu esse. Sie esse viel Fleesch un yuuse alle Schticke vun de Gediere die sie gschlachte hen.

Social Gewehnet: mit annere PD sin sie arrig social. Sie gleiche Versommlinge un Zammelaafe zu halde, awwer mit non-PD Leit sin sie glee bissel weitlefdich am Aafang. Unnich die PD gleiche sie Schpiele wie Kaarde un Quoits schpiele. Danse un singe sin aa beliebt. Viel PD sin glaawige Leit die oft in die Kaerrich geh.

Reproduction: frieher hen die PD viele Kinner ghatt. Es waar normal fer en Familye 8 bis 10 Kinner zu hawwe. Heitesdaages iss 2-3 Kinner meh vun de Norm. Viel PD gleiche zu iewe un ken Kinner griege.

Leweszeit: vun 70-100 Yaahre. Kummt druff aa an wie hatt sie gschafft hen odder wie viel Gschpass sie ghatt hen.

So was denkt dir? Hawwich eppes vergesse odder letzt gschriwwe? Loss mich mol wisse. Ich waerr des zu de Leit bei re “Catalogue of Life” schicke. Vielleicht waerre sie es dricke!