Gschwischder!

Guder Daag Blog Leser! Ich bin wunnerfitzig. Neilich hawwich viel uff en Topic gedenkt: wie annerschd odder aehnlich sin Gschwischder, abaddich ihre Personalities? Ich hab en yingere Bruder, vier Yaahre yinger um genau zu sei. Ich denk ass unsere Personalities net so annerschd sin. Wie mir Kinner waare, hemmer viel vun de gleiche Dinge gegliche. Mir hen Gschicht, Baseball, Yaage, Slapstick Comedy, Inschtrumente schpiele, un annere Sache geluschdert. Mir hen allebeed gegliche Schaerze zu saage. Ya, unsere

 Personalities waare net so annerschd. Nau sin mir elder un nadierlich sin mir net der selwer Paerson. Es gebt Dinge die mir net eischtimme mit. Zum Beischpiel, in Bolitiks sin mir ganz weit vun enanner entfaernt. Ich gleich zu koche, der Steve gleicht yuscht zu esse. Ya, mir sin aehnlich awwer net derselwer. Awwer wie mir Kinner waare, waare mir meh aehnlich ass annerschd.

Nau hawwich zwee Kinner, en Maedel un en Bu. Die Estella iss zwee Yaahre elder ass der Oscar. So es gebt net zu viel Yaahre gschwischich ihnne. Awwer sie kenne net meh annerschd sei. Aye aye aye, sie sin vollschder Gegedeel, wenichschdens ihre Personalities. Die Estella iss ruhich un schichder. Wann mir ariyets gehne, muss sie allsfatt uff meinre Seit sei. Mei Soh, der Oscar, iss laut, uffe, will mit ennich-epper schwetze, un will gaar net uff meinre Seit bleiwe. Er will allsfatt Risks

nemme. Die zwee Kinner kenne net meh annerschd sei. Iss es yuscht en Maedel un en Bu Ding? Vielleicht sin sie so weil ich un mei Fraa sin aa zimmlich annerschd. Fraa Madenford iss ruhich un schichder un ich bin meh uffe un en Extrovert. Ich bin sicher ass es viel iwwer selle Topic in en Psychology Buch gebt. Awwer ich hab ken Luscht so was zu lese! Ich bin yuscht wunnerfitzig.

Wie iss es mit eich? Sin du un dei Gschwischder aa annerschd odder seid dihr meh aehnlich? Loss mich mol wisse!

Do iss en Audio Klip: