Guder Daag Blog Leser! Well do bin ich widder am Waddefresser awwer alles iss anners in unser Haus! Ich kann endlich saage as ich nau en Daadi bin. Sell iss glee bissel kariyos zu saage un zu denke.
Unsere Dochder, die Estella Barbara Madenford, iss um 2:30 mariyets uff Dinschdaag der vierunzwanschigde Tschulei uff die Welt kumme. Mir sin schunn um 1 Uhr am Mundaag-Nummidaag ins Grankehaus gange un dann sin mir datt in Labor bis frieh am Dinschdaag gewest. Alles iss arrig gut geloffe. Mei Fraa hot en arrig gude Tschop geduh! Ich bin arrig schtolz uff sie! Die Gschicht iwwer ihr Naame iss: Estella waar meinre Urgrossmudder Madenford ihr Naame un Barbara waar meinre Mudder ihr Naame.
Wann mei Dochder gebore waar, waar sie arrig glee, yuscht 4 Pund 4 Ounces. Des hot die Doktors glee bissel gedruwwelt. Sie hen gewollt zu wisse fer was sie so glee waar. Sie iss net en Miss, so die Doktors hen sie sofort zu en Hatzmonitor eighenkt. Sie hen sie in en Schtubb mit re Monitor fer zwee Daage behalde. Dann hot die Doktors gsaat as sie hen gewollt es Kind Medizin zu gewwe, in Fall as sie grank waar. Fer sell zu happen, hen sie gemisst es Kind en IV darrich ihr Fuuss gewwe! Sell waar hatt zu nemme…so en gleene Bobbli un sie hot gemisst mit zwee Nodele gschtoche zu sei! Awwer am End waar alles gut.
Mir sin endlich am Freidaag erlaabt heem zu kumme. Nau sin mir alle zamme do daheem. Alles geht arrig gut. Die Doktors saage as alles gut guckt un ich bin arrig froh fer sell. Mei Fraa un ich hen ausgemacht, unsere Dochder mit Deitsch un Englisch uffzuziehe. Mei Fraa waerr Englisch mit ihr schwetze un ich waerr nadierlich Deitsch mit ihr schwetze. Ich kann aa ehrlich saage as es aerschdes Mol as ich sie in mei Erem gehalde hab, waare mei aerschde Wadde zu ihr uff Deitsch. Sell iss en gude Aafang!
Do iss en Audio Klip: En neie Welt!
PA Dutch 101 
Dir und Deiner Frau ganz herzliche Glückwünsche zur Geburt Eures Kindes =) Und Estella ist ein sehr schöner Name 🙂
Liebe Grüsse aus der Schweiz
Gross Dank Iris!
So en schee Bobeli! Ich winsch du mei Bescht!
Gross Dank Michelle. Viel Leit saage as sie schee iss…ich muss mit ihr eischtimme!
Sehr geehrte Familie Madenford,
zur Geburt Ihrer Tochter Estella erlaube ich mir, Ihnen die herzlichsten Glückwünsche auszusprechen. Am Anfang eines neuen Lebens ist jeder Tag ein Abenteuer. Mögen Sie die neue Aufgabe mit Freude und Gelassenheit meistern! Mit freundlichen Grüßen Walter Groß :.
Walter,
Gross Dank fer dei Poscht. Ya, alles iss nau anners do in unsrem Haus. Die gleene iss arrig siess un greischt un brillt net so viel. Ich hoff as sell bleibt aa so!
-Der Doug
Yoh, ich graetschulier Eich! So ne scheeni Maedel meind ich mein schee Maedel, die Emily, wenn sie gebore iss warre!
Fiel Gschpass mit ihr – ass en Daadi mitre Dochter kenn ich saage ass die kenne Eldre arrich schtols mache!
Dein Freind aus Nei Mexico,
Der Bil.
Bil,
Gross dank fer dei Comment. Ya, schtolz bin ich un sie iss arrig schee! Ich hoff as dei Rees nooch Deitschland gut waar. Hoscht du viel Bier gedrunke? In Tschunn as ich datt waar, hawwich!
-Der Doug