Guder Daag Blog Leser! Well, nau is es 2012! Selle Woch will ich eppes katz schreiwe um alli-epper eppes wisse zu losse. Heit hawwich en E-Poscht vun der Alice Spayd grickt. Sie hot gsaat as ich eppes uff mei Blog schreiwe sott iwwer en Broblem in Kutzschteddel.
Alle Yaahr gebt es Klaesses uff der Kutzschteddel University fer Deitsch zu lanne. Selles Friehyaahr gebt es widder en Klaess. Der Brofessor is der Ed Quinter, en arrig guder Mann un en guder Schulmeeschder. Die Klaess is die zwette Semester Klaess, awwer ich bin gsaat as mer braucht die aerschde Semester net zu gnumme hot. Es Semester beginnt uff em 23. Yenner un laaft bis Moi. Ich weess net wann die Klaess dreffe will awwer mer kann der Ed Quinter en E-Poscht schreiwe un er kann dihr alles saage.
Bis heit gebt es net genunk Schtudente fer die Klaess zu gschehe. Mir brauche Leit! Wann du die Klaess net paersehnlich nemme witt, vielleicht kennt dihr epper die Deitsch lanne will. Sei so gut un saag eppes! Nadierlich, koschdet es eppes fer die Klaess, selle Nummer weess ich net. Awwer wann du schunn in die Ruh setzt, koschdet es nix! Mer muss yuscht Noochweis gewwe as mer schunn retired is.
Fer meh Information, schreib der Ed Quinter en E-Poscht an: equinter@kutztown.edu odder du kannscht aa an die Alice Spayde schreiwe: pgalice@verizon.net
Naegschde Woch kumm ich widder zerick mit en neie Poscht iwwer es Nei Yaahr! Bis dann, macht’s gut un schreib eppes!
PA Dutch 101 
Letscht Yaahr hawwich em Ed Quinter sei Klaess gnumme. ‘S waar arrig wunnerbaar, awwer en bissel deier, um 1000 Daahler, wammer net in Ruh setze deet.
Denammidaag hawwich mit em Ed Quinter gschwetzt, unn er hot mir verzehlt, ass er glaabt ass er genunk Schieler hot–siwwe–fer die friehyaahr Klaess zu gewwe. Meh sinn ufkors besser, awwer siwwe Kepp sinn verleicht genunk. Weescht deel deitsch, unn witt viel meh lanne? Ruf der Brof. John Delaney gschwind uff!