Guder Daag Blog Leser! Aye yummer, nau sin mir schunn im 2021. ‘Sis hatt zu glaawe ass en Yaahr widder rum gange iss. Was waerd 2021 bringe? Ich hoff viel Gudes, awwer mir misse yuscht hiehocke un waarde. ‘Sis aa Yenner un mir sin im Winder un fer mich sell meehnt ass ich widder am Veggel fiedre bin.
Alle Yaahr schtell ich zwee Veggelfiedre drausse im mei Hinnerhof. Dann kann ich mich in mei Kich mit en Kuppche Kaffi hiehocke un die Veggel watsche. Graad nau hemmer ee paar Zoll Schnee uff em Grund, so mer kann die Veggel leichter seh. Ihre Farebvolle Kareper poppe gegich der weisse Schnee. Normally kaaf ich en 40 Pfund Dutt voll mit schwatze Sunneblumm Saame…sell waehrt fer vielleicht drei bis vier Woch aus, dann muss ich meh kaafe. Ich schtell aa en Nierefett Kuche drauss, manniche Veggel fresse des arrig viel.
Gemeehnichlich seh ich viel Rotveggel, Blohveggel, Harreveggel, Downy Schpeech, Dauwe, un viel annere verschiddliche Veggel. Sie singe un zippe zu en anner. Sie fliege vun en Baam zu dem Fieder un dann glei zerick um ihre Esse zu fresse. Mannichmol fechde sie mitenanner, awwer net zu oft.
Ab un zu muss ich en Eechhaas odder en Fensemaus weckyaage. Wann die Eechhaase odder Fensemeis datt sin, yautzt un blafft mei Hund viel vun re Dier. Die Eechhaase un Fensemeis druwwelt sich net iwwer es…awwer wann ich mit re BB Flint kumm, dann schpringe sie all schtarrick fatt.
Ya, ich gleich arrig viel mei Veggel zu fiedre. Ich gleich sie zu watsche. Sie sin mei gleene Winder Freinde.