Guder Daag Blog Leser! Selle Woch will ich eppes schreiwe iwwer en yaehrliches Fescht as mei guder Freind hot: Supp Owed. Alle Yaahr uff en Samschdaag in Oktower hot mei guder Freind Supp Owed bei ihm zu Heem. Awwer was is sell? Sell is yuscht was der Naame saagt: en Owed mit Supp. Wann mer zu Supp Owed eigelaade is, muss mer en Crock Pot voll vun Supp mitbringe.
Wann mir alle zamme sin hemmer viele viele verschiddliche Types vun Supp. Selles Yaahr hawwich Sauergraut Supp gemacht…oh sell is yo appeditlich. Dazu mei Supp hemmer aa Grummbier un Kaess Supp, Chili, Gaardesach mit Rinsfleesch Supp, Schunkefleesch un Kaess Supp, un Hinkel un Welschkann mit Nudel Supp ghatt. Mei Freind hot aa ee paar Hot Dogs uff em Grill gemacht un es hot ee paar Leeb frisches Brot gewwe. Wann alles faddig un ready is, dann kann mer Supp esse. Usually is es zimmlich kiehl fer Supp Owed, un die heese Supp schmeckt arrig gut gege es kiehle Wedder. Selles Yaahr waar es Wedder net normal. Es waar zimmlich waarm, awwer die Supp hot so wie so gut gschmackt.
Mir esse nix yuscht Supp, normally gebt es aa Schpiele dabei. Geschder hemmer viel Quoits gschpielt. As viel vun eich schunn weescht, is Quoits en gut bekannte Schpiel fer uns Deitsche. Nadierlich hawwich viel Schpiele gewunne! Was kann ich saage, ich hab en guder Partner ghatt.
Ich gleich Supp Owed viel. Es gebt allsfat gude Supp, Quoits, Bier un annere gude Drinke un en gude Zeit mit Freinde. Was is besser als sell?