Guder Daag Blog Leser! Des Woch will ich eppes abaddiches bringe: en alde gsungene Nei Yaahrs Winsch. Es waar en Tradition in em 19. Yaahrunnert un aa in em friehere 20. Yaahrhunnert fer Leit rumzugeh un Nei Yaahr Winsche an Heiser un Bauerei zu singe. Mir sin arrig glicklich as mir dem Peter Fritsch hawwe. Dem Peter sei Daadi hot alle Yaahr Nei Yaahr Winsche in Deitsch in Longswamp Taunschip, Barricks Kaunty, gsunge un gschpielt. Zum Glick hot der Peter sei Daadis Winsch gelannt un nau mit re Helfe vun dem Mike Hertzog un sei Baend, schpiele sie un singe sie nooch der alde Nei Yaahr Winsch. Selle Woch will ich eich der Winsch gewwe un aa en Link so as dihr es sehne un heere kennte. Do iss der Winsch
Ich winsche dihr un deini Hausfraa so unser Dechder, Gnecht un Mechde, un alle die in dieses Haus ein glickseeliges Neies Yaahr.
Ich winsche eich all grosses Glick un alle Unglick weit zerick. Des 2014 Yaahr geht aus in Naames Yesus Grischt weil des 2015 Yaahr behanden iss. Des aldes Yaahr geht nun dohie dann fange mir en Neies aa.
Weiter winsch ich eich en hochgelobtes Neies Yaahr bis dihr bekummet grohen Haar.
Mir gehne in die Welt un wandern vun einem Yaahr zu annerem, darrich fiehle Aengscht un Plaegen, darrich ziddriche Zeit un Yegen. Darrich Grieg un grosse Schlechene, was uff unsre Welt bedecken.
Gott lob un dank das dieser Zeit des iss erlaabt in Ruh un Friede, Himmelsluscht, Gottes Willes, Gottes Geischt bleibt eich bewoge bis dihr kumme in die Himmel gfloge. Un eirem Sitz da bleibt bereit datt in die ewig Seeligkeit.
Mir schtehne do var eire Dier, uff eirem Land, die Inschtrumente in die Hand. Wann mir raus die Inschtrumente ziehe dann sollscht du heeren des Neies Yaahr anschpielen.
Do iss en Link zu en Live Performance vun sellem Winsch: BCTV PA German Hour (um der Winsch zu seh, muss mer fast forward duhne bis halbwegs darrich der Schau).
Do iss en Link um dem Peter un dem Mike ihre CD zu kaafe: Nei Yaahr CD . Ich kann ehrlich saage as selle CD arrig gut iss. Sie schpiele viele Deitsche Lieder un aa ee paar uff Englisch.