Selle Sunndaag is en wichdige Feierdaag…der Mudderdaag. Fer was hen mir selle Feierdaag? Ich glaab selle Frooge ganz eefach zu antwadde is. Die Mudder hen en Daag in Yaahr fer sie weil die annere 364 Daage sin Arewetdaage fer sie. Ich kann ganz sicher saage as es niemand gebt die so wichdig as dei Mudder is….Gell?
Yuscht denk mol was sie alles fer dich gemacht hot! Sie hot dich fer nein Munet lang in ihre Bauch gedraage. Dann hot sie viel Schmatze ghatt um dich in re Welt zu bringe. Dann hot sie die naegschde 18 Yaahre ihre Lewe fer dich gewwe….fellig. Sie hot fer dich gekocht, dei Gleeder gwesche, sie hot dich iwwer all gfaahre um Dinge zu duh. Hot sie eenichmol geglaagt? Mei nicht.
Mudderdaag is nau schwer fer mich. Ich hab mei Mudder in Auguscht 2006 verlore. Sie hot Grebs in ihre Draagsack ghatt. Sie waar bloss fer drei Munet grank bis sie gschtarewe is. Es macht mich allsfaat bedauerlich wann die Mudderdaag widder rumkumme.
Ich hoff as alle vun eich eppes schee fer dei Mudder am Sunndaag duh! Nemm sie zu en Essblatz odder koch sie eppes! Un mach fer schurr as du sie en grosse Boss gewwe!