Guder Daag Blog Leser! Des Woch hot mei Fraa Bicher zu unsere Kinner gelese….wie gewehnt. Mir lese yede Owed Bicher zu unsere Kinner. Ich waar in die Kich un ich hab mei Fraa gheert…es waar Mammi Gans Gedichte. Ich hab graad gedenkt, ich sett mol ee paar uff Deitsch fer mei Blog iwwersetze. Dann hawwich errinert ass epper, der en arrig bessere Schreiwer waar, hot es schunn geduh: der John Birmelin. So des Woch will ich eich ee paar vun dem John sei Iwwersetzing gewwe.
Hei, diddel, diddel.
Hei, diddel, diddel – Die Katz mit de Fiddel – Die Kuh schpringt iwwer der Muun. – Es Hundelche lacht – Un weddelt un blafft; – Die Schissel un Leffel – Die schpringe um’s Effel – Wie ewwe so Schussliche duhn.
Georgie, Porgie, Blaume Boi.
Georgie, Porgie, Blaume Boi, – Bosst die Maed, en ganzi Roi, – Wann sie awwer heile dann, – Ya, do schpringt er was er kann.
Pitter, Pitter, Karbsefresser.
Pitter, Pitter, Karbsefresser, – Hot en Fraa, die weess net besser, – Halt sie in ‘re Karbseschaal, – Gleicht sie datt noch ‘s bescht vun all.
Pitter, Pitter, Karbsefresser, – Meent er gleicht en annri Besser. – Pitter, sell iss gar net schee, – Musscht zu deinre erschte geh!
Pitter, Pitter, Karbsefresser, – Gleicht en annri doch net besser; – Lannt er Lese, lannt er Schreiwe, – Will er bei de Erschte bleiwe.
En aldi Grossmammi die wuhnt imme Schuh
En aldi Grossmammi die wuhnt imme Schuh – Sie hot so viel Kinner un Druwwel dezu; – Sie gebt ‘ne zu esse, doch yo net zu fett, – Sie garbt sie gedichtich un yaagt sie ins Bett.
Yankee Doodle
Yankee Doodle kummt emol – Geritte uff ‘me Pony, – Schteckt en Fedder in der Hut, – Un saagt ‘s waer Macaroni.