Guder Daag Blog Leser! Well as viel vun eich schunn wisst, mir in Amerikaa sin graad in der Mitt vun en grosse bolitikal Schlacht. Die Republikaaner un die Demokraate fechde fer ihre Paerson fer Bresident in November. Un was fer en Fecht es iss!
Der Mann mit all die News un Comments iss der Donald Trump, der super reicher Business Mann aus Nei Yarrick Schtadt. Ya, er hot Millyonen odder vielleicht Billyonen vun Dollars in sei Bank Account. Er waar uff em Guckbax mit sei Celebrity Apprentice Show. Nau iss er een vun de Republikaaner, der fer es Weisse Haus geht.
Freinde vun mir hen mir gfroogt eb der Trump en Deitscher iss. Ich waar net ready fer selle Froog. Ich muss ehrlich saage ass ich ken grosse Fan vun dem Trump bin. Un wann sie sell gfroogt hen, waar ich glee bissel iwwerfalle. So ich bin zu der Internet gange um meh Information zu finne.
Ya, dem Trump sei Familie iss aus der Palz kumme! Trumps Grossdaadi, der Frederick Trump, un sei Fraa die Elizabeth Christ Trump sin nooch Amerikaa im Yaahr 1885 kumme. Ihr Heemetschtadt waar Kallstadt in der Palz. In Amerikaa der Frederick hot aagfange Hotels un Essbletz zu baue. Er waar erfolgreich un so waar aa sei Soh un nau sei Kindsbuh, der Donald. Ich hab aa in Internet gefunne ass frieher sei Familyenaame waar Drumpf gschriwwe awwer nooch em Yaahr 1600, hot die Familye es ass Trump gschriwwe. Awwer iss er en Deitscher? NEE!
Viel hochgelannte Leit saage ass fer epper en Deitscher zu sei misse es zwee Dinge gewwe:
1. Die Voreldre hen gemisst aus sudd-wescht Deitschland kumme: der Palz, Rhein-daal, Franken-daal un so weiter.
2. Die Voreldre hen gemisst eb em Yaahr 1840 nooch Amerikaa kumme.
So vun de zwee “Regel” iss der Trump net en Deitscher. Un fer sell bin ich froh.
Do iss en Link zu en News Video iwwer Trumps Heemet in Deitschland: Kallschtadt. Die aerschde fimf Minudde schwetzt iwwer sell. Mir wisse nooch net eb der Trump gwinne waerr odder net. Mol sehne wie die Republikaaner schtimme. Fer uns do in Pennsylvaania, misse mir bis schpot Abrill waarde fer unser Schtimmdaag.