Guder Daag Blog Leser! Well, as ich letschde Woch gschriwwe hab, selle Wochend waar Gedechtnisdaag do in Amerikaa. Ich un mei Fraa sin nooch Heem gfaahre um mei Familye zu sehne. Yeder Gedechtnisdaag Wochend geh ich mit meinre Grosseldre uff viele verschiddliche Karrichhoffe fer Blumme uff em Greewer zu schtelle.
Selles Yaahr sin mir zu de normal Greewer un ee paar annere aa gange. Meim Grossdaadi sei Eldre sin in Shillington begraabt. Mir gehne datt alle Yaahr. Dann sin mir nooch Molltown gange fer meinre Grossmudder ihr Grosseldre, Eldre, ihr Bruder, un mei Mudder.
Ee paar Yaahre zerick hawwich viel Geneology geduh un ich hab viele vun meinre Voreldre gefunne. Mei Gross-Gross-Grosseldre uff mei Grossdaadis Seide sin in en alde Karrichhof in Reading begraabt. Mir sin aa dattgange um sie widder zu finne. Fer schurr hemmer sie gefunne, awwer die Karrichhof waar net so schee. Viele Graabschtee sin iwwergfalle un die Grass waar aa net so gut gemaeht. Sell finn ich arrig schlecht, awwer was kann mer duh?
Nooch unser Rees darrich Reading sin mir nooch Virginville gfaahre. Datt sin mei Gross-Gross-Grosseldre vun meinre Grossmudder begraabt. Sie sin in Dunkels Karrichhof begraabt. Selle Karrich is nix meh. Die Karrich is datt awwer die Gemee sin schunn lang fattgange. Die Karrichhof seht gut aus, awwer die Karrich net so viel. Sell hawwich drauerich gefunne, en alde Karrich, un kee Gottesdinscht meh.
Mir sin aa in ee paar alde Karrichhoffe gange, die waare so alt, as sie viel Graabschtee vun em 1700s ghatt hot! Viel vun die Graabschtee waare in Hochdeitsch gschriwwe. Ich hab viel Greewer vun Revolutionary un Civil Grieg Soldaade gsehne. Nadierlich, hen sie all ganz neie Faahne newwe sie.
Ich gleich arrig viel uff en Karrichhof rumzulaafe. Mer seht Gschichte, alde Naame un alde Soldaade. Gleicht eich aa darrich en Karrichhof zu laafe?