Guder Daag Blog Leser! As viel vun eich schunn wisst, bin ich uff en Bauerei uffgwaxe. Nadierlich hemmer allsfatt en Hund ghatt. En Bauerei mitaus en Hund iss ken Bauerei! Dann bin ich fattgange um uff der College zu geh. Fer vier Yaahre hawwich ken Hund in mei Lewe ghatt. Dann wann ich faddich mit re Lanning waar, hawwich widder en Hund grickt, en Golden Retriever mit dem Naame, Sadie. Sie waar en arrig guder Hund, siess, ruhich un liebvoll. As sie gschtarewe iss, bin ich viele Yaahre mitaus en Hund gewest.
Im Yaahr 2010 bin ich gheiert un hab en Haus kaaft. Die Yaahre sin zimmlich schtarrig vorbei geloffe. Dann sin mei zwee Kinner kumme. Un widder sin die Yaahre vorbeigange. Ich muss ehrlich saage, es Lewe waar so busy, ass ich zu mir selwert gsaat hab, mir hen ken Zeit fer en Hund. Ich kann net glaawe ass ich so gedenkt hab. Fer es letschde Yaahr odder so, mei Dochder hot alle Owed fer en Hundli gebetet. Ich hab gewusst ass es Zeit waar widder en Hund zu hawwe.
Fer die letschde paar Woch bin ich im Internet gange um en Hundli zu finne. Es Broblem iss ass nau ass ich elder bin, hawwich Allergies gege Pet Dander. Ich weess net ferwas, awwer so iss es. ‘Sis so schlimm, ass ich net in en Haus gehe kann wann sie en Katz hen. So ich hab gemisst en Hypoallergenic Hund zu finne. Es gebt ee Paar Breeds die so sin. Ich hab aa gewollt en grosse Hund, ich gleich sie viel besser as gleene Hunde. Zum Glick hawwich mei Research geduh un en guder Breed gefunne: en Standard Poodle, odder as sie in Hochdeitsch saage: en Keenichspudel.
Endlich geschder sin mei Dochder ihre Bede geantwattet. Mir hen en Breeder in Clearfield Kaunty gfunne die Hundli hot. Mir sin een un en halb Schtunn gefaahre um unser neie Freind zu griege. Mir hen mei Dochder vollig iwwerascht ass sie heem vun der Day Care kumme iss.
Nau hemmer der Klang vun vier haarige Dobe im Haus, un so siess en Klang iss es. En Haus mitaus en Hund iss net so vollschtendich ass en Haus mit en Hund.
