Guder Daag Blog Leser! Well, do bin ich widder mit en neier Poscht. ‘Sis nau Oktower do in Pennsylvaania un es Wedder iss am wexsele. Die Nechte sin kiehler un die Daage sin katzer, Schpotyaahr iss nau fer schurr do. Aa, mei Hof iss voll mit Bledder, iwwerdem muss ich mei Reche finne un sie zammereche. Sell macht Gschpass fer die aerschde paar Minudde, awwer dann iss es yuscht Arewet. Vielleicht waerr es anners selles Yaahr sei, as mei Dochder endlich gross un alt genunk iss in die Bledder zu schpiele un zu tschumpe.
Mei Poscht selle Woch hot nix mit em Schpotyaahr zu duh. Ich will en Lied in unsere Mudderschprooch deele. “Daheem uff die alt Bauerei” iss en bekanntes Lied in die Grundsau Lodsche un uff die Versammling Circuit. Die Wadde saage viel iwwer unser Kuldur un unser ewige Verbinnung mit re Bauerei un dem Bauer sei Lewe. Der G. Gilbert Snyder hot selles Lied gschriwwe un hot es zu re Melodie vun “Home on the Range” gsetzt. Der aerschde Vaersch iss iwwer es Lewe uff re Bauerei, awwer was ich gleich iss der zwette Vaersch. Der zwette Vaersch iss iwwer der nei Bauerei, die Bauerei im Himmel. Sell iss yo Deitsch, gell? Wann en Deitscher schtarebt, was wolle mer in Himmel finne? Nadierlich, en neies Lewe uff en Bauerei. Sell find ich so siess un gut. Ich hoff, wann ich die Rees nooch mei Gott macht, waerr ich en neie Bauerei finne wu ich in die Ewigkeit mit meinre Familye un all die Gediere un all die Heiliche mitaus Schtress un Druwwel in de Felder schaffe kennt.
Do iss der G. Gilbert Snyder’s Lied: “Daheem uff die alt Bauerei”
O ferwas bin ich vun die alt Bauerei?
Datt waar doch alles gedrei.
Wu gaar nix aageht, as mer nooch net verschteht,
daheem uff die alt Bauerei.
Die alt Bauerei! Datt waare die Kelwer un Sei.
Datt waar gaar nix letz, es waar niemand am gretz.
Daheem uff die alt Bauerei.
Ich kumm mol ee Daag zu der nei Bauerei,
Im Himmel wu alles iss fei.
Mei Freind sehn ich garn, es iss die letscht Arn,
daheem uff der nei Bauerei.
Die nei Bauerei! Datt sin die Leit haerlich un frei.
Die Freindschaft iss datt – sie gehn nimmi fatt.
Daheem uff die nei Bauerei.
Macht’s gut liewe Leit. Ich hoff ich waerr all vun eich iwwerdem in Himmel uff en nei Bauerei sehne.