Guder Daag Blog Leser! Well selles Wochend bin ich widder heem gfaahre um mei Familye mit eppes wichdig zu helfe. Alle Yaahr in September is es die Zeit unsere Grummbiere rauszuroppe.
Alle Yaahr in Abril blanst mei Daadi iwwer 100 Pounds Grummbiere in unsre Gaarde. Grummbiere sin leicht zu hawwe. Mer blanst sie im Friehyaahr un dann kann mer sie bis Schpotyaahr vergesse . Ya, nadierlich muss mer die Umgraut rausroppe un vielleicht ee paar Grummbierekeffer dodmache, awwer mer muss really net zu viel duh.
Dann kummt es Schpotyaahr un die Zeit um die Grummbiere zu aernde. Wie weess mer as sie ready sin? Wann all die Grummbiereschtengle gschtarewe sin, sin sie ready rauszuroppe. Mer kann sie eifach mit en Grummbieregawwel rausschteche awwer wann mer viel Grummbiere geblanst hot, nemmt sell zu lang. Mei Familye yusst en Traktor un en Grummbiereblug. Unser Blug is arrig alt, ich weess net wie alt er is awwer verdammtsei alt. Alt er is, awwer es geht immernooch.
Normally, faahr ich der Traktor un mei Daadi geht hinnich der Blug. As ich en Kind waar, hab ich gemisst yuscht datt zu schteh un gucke bis die Grummbiere rausgeblugt waare. Awwer nau bin ich der Faahrer. Nooch der Traktor un Blug darrich es Gaarde gange sin, is es die Zeit alle die Grummbiere zu finne. Mer muss der Grund rumkicke um all die Grummbiere zu finne. Dann losse mir sie dattliege um abzudrickle. Dann muss mer all die Grummbiere ufflese.
Wann all die Grummbiere uffgelese sin, gehne sie in em Keller fer es Winder. Nau hot mer Grummbiere zu esse. Selles Yaahr hen unsere Grummbiere net so gut geduh. Der Summer waar zu heess un drucke, un dann hemmer en Hurrikane grickt un es waar zu nass. Geschder wann mir die Grummbiere rausgeroppt hen, waar es arrig schlimm. Der Daadi hot sex Roi geblanst un mir hen yuscht baut vier Buschel grickt! Normally griege mir 2o odder 30 Buschel! Ya, selles Yaahr waar net so gut. Awwer so geht es uff en Bauerei, ‘sis allsfatt en Gamble. Hoffetlich waerd naegschdes Yaahr besser!