Guder Daag Blog Leser! Viel Leit kenne saage was ihre Leibyaahreszeit is. Well, ich kann so en Decision net mache. Ich gleich all vier Yaahreszeite: es Friehyaahr hot Blumme, der Summer hot waarme Daage un viel Gudes in em Gaarde zu esse, es Schpotyaahr hot scheene Daage un die Bledder sin arrig farevoll, un der Winder is kalt mit Eis un Schnee awwer ich gleich darrich der Schnee rumzulaafe.
Awwer nau is es Friehyaahr do in Nadd-Amerikaa. Wie weess mer as es warricklich Friehyaahr is? Mer kann saage, well die Daage sin lenger un die Daage un Necht sin warmer. Die Veggel sin am singe un es Grass waerr griener. Ya, sell is recht, awwer fer mich drei Dinge saage Friehyaahr zu mir: Biddere Selaat, Pingschtblumme un Rhabarbraa.
Biddere Selaat is eppes der frieh im Friehyaar gesse waerr. Gwehnlich kann mer baut Oschderzeit in em Grass fer es yaage. Mannichmol muss mer hatt yaage, un manichmol gebt es so viel im Grass as mer net so hatt gucke muss. Nooch em Yaag muss mer es butze un dann kann mer es esse. Ich gleich Biddere Selaat arrig viel. Do in Pennsylvaanisch Deitschland esse mir Biddere Selaat allsfatt mit heisse Schpeckdunkes. Aye yummer is sell awwer gut! Ich hab oft gelese as mer net so viel Biddere Selaat esse sott, es gebt zu viel Vitamins un Folic Acid. Awwer wann mer yuscht en normal Portion hot, is es wunnerbaar gsund.
Ah, Pingschtblumme! Uff der Bauerei wu ich uffgwaxne bin hot es viel Pingschtblumme gewwe. Ich glaab sie sin mei Leibblumme. Sie rieche so siess un guckt so schee aus. Viel annere Leit misse ihr Schmack aa gleiche. Wann mer eikaafe geht gebt es viel verschiddliche Reichdrobbe mit Pingschtblumme as ihr Schmack! Zum Glick, draagt mei Fraa oft Pingschtblumm Reichdrobbe. Wann sie so duht, dann hock ich mich glee bissel naekschde aa!
Es gebt en Blanz die allsfatt im Friehyaahr rauskummt. Viel Leit wolle es net esse, awwer ich fer schurr. Rhabarbraa guckt glee wennich luschdig aus, awwer schmeckt arrig gut! Was ich arrig gaarn ess, is en Rhabarbraa un Aebeer Pei. Mei Grossmudder macht aa en Dunkes aus Rhabarbraa, es arrig gut uff Eisraahm is!
Selle Woch as eich rumfaahrt, sei so gut un gucke mol fer die drei Dinge. Geh am yaage fer glee bissel Biddere Selaat, robbt ee paar Pingschtblumme un bringt sie im Haus, un kaaft ee wennich Rhabarbraa un backt mol en Pei. Ich bin sicher as alle vun eich saage waerrt as es fer schurr Friehyaahr is!