Guder Daag Blog Leser! Well nau sin mir im Matz…der Winder iss noch drausse awwer es Friehyaahr schniekt langsam nei. Waremere Daage, Blumme, griene Graass…ya sie alle waerre ball do sei. Weesscht du was aa ball do sei waerrd? Die Deiwelszeit! Yep, uff de 14. Matz gehne mir widder in die Deiwelszeit. Um zwee Uhr am Mariye misse mir unsere Uhre ee Schtund vorschiewe. Dann waerre mir widder in die Deiwelszeit sei. Dann im November tschumpe mir widder ee Schtund zerick.
Die Deiwelszeit iss zimmlich nei. Es aerschdes Mol fer es do in Amerikaa waar im Yaahr 1918, awwer der Ben Franklin hot es schunn im 18. Yaahrhunnert driwwe gebabbelt. Die Idea iss mit “Daylight Savings Time” kenne mir mehr Leckdrick schpaare. Die Sunn waerr lenger uff…es macht Sinn. Awwer fer die Deitsche Leit die am lewwe im 1918 waare, waare die neie Zeit schlecht un gege was Gott gemacht hot. Deswege hen sie “Standard Time” ass Gotteszeit benaamt!
Fer mich persehnlich iss die Zeit Wexling zimmlich hatt. Mei Kareber iss all verhuddelt fer ee paar Daage. Wie iss es bei dir? Aa so? Viel Leit do in Amerikaa saage es mir solle yuscht eefach uff die Deiwelszeit bleiwe un die Uhre net meh wechsle. In Arizona un Hawaii gebt ken Deiwelszeit, sie bleiwe uff Gotteszeit.
Es aerschdes Land es Deiwelszeit geyuust hot waar Deitschland im 1916! Darrich die Zwette Welt Grieg hot der Bresident Roosevelt gsaat ass Amerikaa waerrd uff Deiwelszeit bleiwe bis die Grieg am End waar. Im 1974 wann es Eel Druwwel waar hot Amerikaa Deiwelszeit fer en ganzes Yaahr geduh.
So was denkt eich? Gleicht dihr die Deiwelszeit? Solle mir unsre Uhre wechsle odder yuscht uff Deiwelszeit bleiwe? Loss mich mol wisse!