Guder Daag Blog Leser! ‘Sis Oktower 2020…was en Yaahr! Graad nau hock ich mich am Disch mit en Koppche Kaffi un bin am denke. Fer uns do in Amerikaa iss unser Lewe unnerscht-ewwerscht. COVID-19, Online Schul, un…….en Leckschen. Do iss en katzes Gedicht iwwer was yede Daag in die Noochricht kummt un wie ich alles graad nau seh.
Zwee Mannsleit
Alle vier Yaahre gebt es en grosse Uffrohr.
En Paerson will in es Weiss Haus wuhne.
In yuscht ee paar Woch waerd’s en Antwatt gewwe.
Awwer bis dann, was fer en Seierei!
Des Mol gebt es der Trump un der Biden.
Allebeed saage ass sie der beschte Paerson fer der Tschopp sin.
Uff mei Guckbax, in mei Zeiding,
Emails, Text Messages, Uffrufe,
Bekanntmachunge im Internet, Bekanntmachunge in mei Poscht.
Schilder in de Leit ihre Graasbletz,
Faahne var de Leit ihre Heiser, odder uff de Leit ihre Pickup Trucks.
‘Sis iwwerall Leckschenfiewer, un mei Land iss warricklich grank.
Leit greische un schtreide in de Schtroosse,
in die Supermarrick, uff em Internet.
Bischt du rot odder bloh…gebt’s kenn annere Wahl,
so denke viel Leit.
Sin mir net all Amerikaaner?
Aerschde Dinschdaag in November…
geht’s alles vorbei?
Vielleicht, vielleicht net.
Kummt Fried endlich zu unser Land?
Vielleicht, vielleicht net.
Ich bin mied. Ich bin grexsich. Ich bin abgefiehrt.