Guder Daag Blog Leser! Well, do sin mir in der Mitt vun Abrill un allsfatt noch in Lock Down do in Pennsylvaania. Die Corona Virus iss noch am rumschpringe. Viel Leit sin schunn gschtarewe un yede Daag kumme meh Leit in em Grankehaus. Mir wisse nooch net wie lang es ausdauere waerrd.
Awwer mei Froog fer heit iss, was kummt nooch der Cornoa? Wie waerre unsre Lewe ennere? Wie waerrd en “Post Corona” Welt gucke? Ich hab schunn ee paar Schtories im Internet un in Magazines gelese. Manniche Leit saage ass die Welt sich schtarrick verennere waerrd. Grosse Versammlinge vun Leit waerre nimmi gschehe. Leit waerre die Hand net meh gewwe. Social Distancing waerrd bleiwe. Viel gleene Schtors waerre zumache un nimmi uffmache. Mammi un Daadi Essbletze waerre net iwwerlewe. Die Poscht Affis waerre zumache.
In so en Welt will ich net lewe.
Ich denk ass viel vun soddiche Dinge sin yuscht zu apocolyptic fer mich. Ya, ich glaab die Welt waerrd sich verennere, awwer vielleicht waerrd es in en bessere Form rauskumme. Vielleicht waerre Leit meh uff en anner Acht gewwe, mir waerre meh menschlich, behilflich, un dankbaar sei. Vielleicht waerre annere Lenner mit en anner schaffe so ass was in die Zukunft net so schlimm sei waerre. Vielleicht unsre gebrochene Systems waerre gefixt. Vielleicht Amerikaa waerrd aa yo besser…meh fair un gerecht.
In so en Welt will ich lewe.