Guder Daag Blog Leser! Well, des Woch geh ich widder in die Schul. Es waerrd mei 19. Yaahr ass Schulmeeschder sei. Die Kinner kumme am Dinschdaag, un ich muss ehrlich saage, fer es aerschdes Mol in mei Career, bin ich arrig besarigt. Mei Schul, wie viel annere, waerrd en Hybrid System yuuse. Die Kinner kenne zur Schul kumme odder Heem bleiwe un lanne Online. Alles nadierlich wege COVID 19.
Schtress un Angscht iss arrig hoch bei mir un aa bei annere Schulmeeschder. Die mehnscht vun mei Schtudente kumme zerick “Gsicht zu Gsicht.” Sell mehnt ass ich schier gaar 30 Kinner yede 84 Minudde in mei gleene Klaessschtubb hawwe waerr. Ich kann net Social Distancing duh, mei Schtubb iss zu glee. Nadierlich misse alle Face Masks aahawwe, awwer mir waerre wie Sardines in en Kann sei. Am End der Daag waerr ich baut 100 Kinner seh….un wennicher ass sex Fuus vun mir weg.
Ich muss aa tietsche un laerne zu all die Kinner. Sell mehnt ass ich nadierlich uff die Kinner in mei Schtubb achte muss, awwer aa uff de Kinner Online. So des Yaahr muss ich die ganze Zeit hinnich mei Waddefresser hocke un laerne. Die Online Kinner waerre mei Klaess livestreame so ich muss aa zu ihne schwetze un aa gleichzeitich zu de annere Kinner aa babbele. Ich weess net wie gut es sei waerrd. Un was duh ich wann es Technology Druwwel gebt? Aye aye aye, es macht mich zu kotze!
Am Dinschdaag waerr ich mei gude Gleeder un mei Face Mask aaduh. Ich waerr zu Schul mit mei Kaffikoppche faahre. Ich waerr en grosse Gebet saage. Un ich waerr hoffe ass alles gut geht….so gut wie meeglich. Ich hab oft im Internet en Meme gsehne die saagt: “Des Yaahr alle Schulmeeschder sin widder in ihre aerschdes Yaahr,” so fiehl ich.
Ich waerr mei Beschdes duh, oh, un hoff ass ich gsund bleiwe.