Guder Daag Blog Leser! Well, heit iss mei Land sei 244. Gebottsdaag. 244 Yaahre iss en langi Zeit un ich hoff ass mei Land viel meh Gebottsdaage hawwe waerrd. Nau hot mei Land ee bissel Druwwel, awwer ich denk mir waerre darrich kumme, un vielleicht en besseres Land rausschaffe. Fer sei Gebottsdaag, hawwich es gut bekanntes Lied, Yankee Doodle iwwersetzt. Sing mit!
Yankee Doodle
Yankee Doodle geht zur Schtadt
reidet uff sei Gauli
schteckt en Fedder in sei Hut
un nennt es Macaroni.
Chorus:
Yankee Doodle, halt es nuff
Yankee Doodle dandy
Achd uff die Myusick un der Schritt
un mit de Maed sei hendich!
Daadi un ich gehn’ zur Camp
mit dem Captain Gooding
die Mannsleit un de Buwe waar’
so dick wie hasty Pudding
Chorus
Datt waar der Captain Washington
un sanfde Leit um ihm rum
er iss so arrig arrig Schtolz
er will net mitaus ihn’ reide.
Chorus
Hallicher Gebottsdaag, Amerikaa!
