Nooch vier Yaahre, iss es endlich so weit kumme. Der Movie, “Hiwwe wie Driwwe: Paelzisch in Amerikaa” hot sei Welt Premiere in Deitschland ghatt. Der Movie iss en Documentary, der browiert die Watzle vun Pennsylvaanisch Deitsch zu finne. Der Christian Schega un der Benjamin Wagener, die zwee Moviemacher, hen am End en 90 Minudde lang Documentary gemacht der verzaehlt graad was sie uffgsucht hen. Im Summer vun 2017 sin die zwee Moviemacher noch Pennsylvaania kumme un hen drei Woch lang in Kutztown un die Umgegend gefilmt. Sie hen viel Zeit uff die Kutztown Folk Fescht gefilmt un hen viel Leit geinterviewed. Der Haapterzaehler (ich) bringt die Audience darrich sei Heemet un dann in der zwette Helft vun der Movie geht noch de Palz in Deitschland um zu sehne vun wu unsere deitsche Watzle kumme.
Der Movie hot en Premier Tour darrich de Palz in der Mitt vun Abrill gemacht. Die aersche Showing waar in Landau zu en ausverkaafte Audience. Fer die naegschde sex Daage waar der Movie in viel verschiddliche Movie Theaters in der Palz aagewisse. Zu yede Showing waar die Movie Theaters widder ausverkaaft. Darrich die Tour hen der Schega, der Wagener, un ich en “Q und A” Session ghalde. Yedes Mol hot die Audience viele gude Frooge gfroogt un so viel waare echt froh mit dem Movie.
Die Moviemacher hen aa viel gude Advertisement fer der Movie geduh. Mir waare oft im Guckbax, im Schwetzkaschde, un in viel Zeidinge. Nadierlich waar aa viel in Social Media geschriwwe.
Der Movie waerrd weiter in Deitschland aagewisse un in Tschunn kumme die Moviemacher widder noch Amerika. Sie waerre der Movie aa uff em Kutztown Folk Fest aaweise un in ee paar Theaters in Pennsylvaania. Fer meh Information, bsuch mol ihre Website: hiwwewiedriwwe.com
Do sin ee paar Pickders vun re Movie Tour:
