Guder Daag Blog Leser! Well ‘sis Aagscht un mir sin in de Hunde Daage vun Summer. Do in Pennsylvaania iss es gemeenerhand in schpot Tschulei un Aagscht heess un schmodich. Ich hab gsehne ass in Deitschland es arrig heess un darr alldiweil iss. Ya well, mir sin nau in de “Hunde Daage vun Summer”. Mir alle kenne des Ausdruck, awwer ferwas saage mir es? Ich hab aa net gewusst, so ich bin im Internet gange um en Andwatt zu finne.
Die Hunde Daage vun Summer sin die heesse, schmodiche Daage vun Summer. In re Gschicht waare sie die Daage noch dem Uffgang vun der Schtann Sirius. Die Greeks un die Romans hen die Schtann Sirius ihr Uffgang mit Hitz, Drickning, Dunnerwedder, Fiewer, verrickte Hunde un schlechte Glick zammeghenkt. Heitzudaage sin es es heesschte un umleidichschte Deel vun dem Summer in der Naddhalbkuggel.
Der Englische Naame iss en Calque vun der Latein (dies caniculares – “Hundli Daage”) un sell kummt aus der Greek (κυνάδες ἡμέραι – “Hunde Daage”). Fer die Greeks die Schtann Sirius waar die Hund Schtann weil sie Orion in die Himmel nodappt.
Noch der Old Farmer’s Almanac, sin die Hunde Daage die 40 Daage vun der 3. Tschulei bis der 11. Aagscht. Es gebt aa des:
Die alde Leit glaawe as Regge uff de Hunde Daage waar es schlechtes Aazeeche:
Hunde Daage hell un glaar zeige en glickliches Yaahr aa; awwer wenn mit Regge begleedt sin, fer bessere Zeide, unsre Hoffning iss umsunscht.
un
Hunde Daage kumme; du musscht Hoi un Eil mache wann die Sunn scheint, fer wann alde Sirius Adder vun em Wedder nemmt, iss er so en schwankicher, verrickter Hund, es gebt ken Abhengichkeit uff ihm. – Old Farmer’s Almanac, 1817.
Fer mich die Hunde Daage sin net so schlecht, ich hab mei Air Conditioner! Wie iss es bei eich? Gleicht dihr die Hunde Daage vun Summer?