Guder Daag Blog Leser. Am Mundaag hot mei Grossdaadi Madenford Gebottsdaag. Er waerr 89 Yaahre alt sei, un er behaevt sich wie er yuscht 40 Yaahre alt waar. Er hot viel Glick as er so gsund iss, un mir sin aa dankbaar as er so aktiv un allsfatt nooch rutschig iss. Im Ehre vun sei Gebottsdaag, hawwich gedenkt as ich en Blog Poscht iwwer sei Gebottsyaahr, 1925, schreiwe. Do sin die wichdige Dinge die im Yaahr bassiert sin.
Yenner
3 – Der Benito Mussolini (Il Duce) hot bekannt gemacht as er der neie Diktator in Italy waar.
5 – Die Nellie Tayloe Ross waar die aerschde weibliche Governor (Wyoming) in Amerikaa.
Hanning
10 – Mei Grossdaadi, der Ray Henry Madenford, iss in State Hill, Barricks Kaunty gebore.
21 – The New Yorker Magazine gebt sei aerschde Schtick raus.
Matz
4 – Dem Bresident Calvin Coolidge sei Inauguration waar die aerschde Inauguration die mer uff em Schwetzkaschde heere kennt.
18 – Die Tri-State Tornado, die deedlichschde in Amerikaanische Gschicht, schpringt darrich Missouri, Illinois un Indiana. 695 Leit sin gschtarewe un 2,027 Leit sin beschaedicht.
Abrill
10 – Der F. Scott Fitzgerald gebt The Great Gatsby raus.
Moi
5 – In Dayton, Tennessee, Biology Schulmeeschder, der John Scopes, iss feschtgenumme fer sei Laerne vun dem Charles Darwin sei Gedenk vun Evolution.
Tschunn
6 – Die Chrysler Corporation iss vun dem Walter Percy Chrysler erschafft.
29 – En 6.8 Aerdbeewing beschaedicht Santa Barbara, Kalifornia.
Tschulei
10 – In Dayton, Tennessee, die so genaamte “Monkey Trial” faangt mit dem John T. Scopes aa.
18 – Der Adolf Hitler gebt sei paersehnliche Manifesto “Mein Kampf” raus.
21 – Der John T. Scopes iss schuldig gefunne vun re Laerne vun Evolution un muss $100 bezaahle.
Aaguscht
8 – Die Ku Klux Klan zeigt wie bekannt sie sin mit en grosse Schtrutz in Waschington DC. 40,000 Mannsleit un Weibsleit (Mitglieder vun re Klan) sin uff em Pennsylvaania Avenue gschtrutzt. Im Yaahr, ‘sis gerode as baut 5 millyonen Leit sin in re Klan. Zu re Zeit, waar es die greeschde Fraternal Organization im Land.
September
3 – Die Dirigible Shenandoah iss iwwer Caldwell, Ohio uffgebroche. 14 Leit sin gschtarewe.
Oktower
1 – Mount Rushmore National Memorial in Sudd Dakota iss eigweidt.
November
28 – Die wochliche Country Myusick Brogramm, Grand Ole Opry, iss fer die aerschde Mol uff em WSM Schwetzkaschde in Nashville, Tennessee gschpielt.
Diesember
1- Die Locarno Teaties sin in London unnergschriwwe.
Bekannte Leit die aa im 1925 gebore waare: Paul Newman, Jack Lemmon, Malcolm X, Tony Curtis, Barbara Bush, Medgar Evers, Merv Griffin, Bill Haley, Peter Sellers, Mel Torme, B. B. King, Margaret Thatcher, Angela Lansbury, Johnny Carson, Robert F. Kennedy, Sammy Davis Jr., un Dick Van Dyke.
Bekannte Leit die im 1925 gschtarewe sin: Sun Yat-sen, John Singer Sargent, Pancho Villa, William Jennings Bryan, un Christy Matthewson.
Mir kenne sehne as viel im Yaahr 1925 bassiert iss. Awwer fer mich, yuscht ee Ding iss wichdig: meim Grossdaadi sei Gebottsdaag! Mitaus sell, waerr ich net do sei! Hallicher Gebottsdaag Grossdaadi!
