Yaahre zerick hot en Bauer ee Schitck Land kaaft un hot en Laayer dazu grickt fer sarye ass alles ganz richdich geduh waar. Wu es kumme iss fer der Laayer zu bezaahle, hot der Bauer sich verwunnert wie viel des koschde soll un hot sich ee bissel beglaagt.
Noh hot der Laayer zu ihm gsaat: “Des iss Kopparewet, des muss gut bezaahlt warre!”
Zimmlich lang noch dem hot der Laayer Holz grickt vun dem Bauer un der Bauer hot’s Holz zu dem Laayer sei Haus gfaahre mit sei zwee schwere Geil un Waage. Er hot’s Holz in dem Laayer sei Holzschopp gesetzt un noh waar’s Zeit fer bezaahle.
Noh hot der Laayer sich verwunnert wie viel ass des koschde soll. Der Bauer hot noh gsaat: “Des iss Kopp’s Arewet, des muss gut bezaahlt sei, des waar mei Kopp un mei zwee Geil ihre Kepp ass all gscheffdich warre mit dem Holz faahre!” – vun der Nancy Martin gschriwwe.
Zwee Blondes waare mit enanner am schwetze. Die eene hot die annere gfroogt: “Saag mir, was iss weiter, Nei Yarrick Schtadt odder der Muund?” Die annere Blonde hot gsaat: “Aye yummer du bischt awwer dumm! Kannscht du Nei Yarrick Schtadt vun do sehne?”
Do iss en Audio Klip:
PA Dutch 101 