Liewer Belsnickel 2021!

Diesember 2021

Liewer Belsnickel,

Ich hoff ass mei Brief dich gut findscht. Was fer en Yaahr, gell? Ich habe gedenkt ass 2020 hatt waar un dann hawwich gedenkt ass 2021 fer schurr besser sei waerrd. Ich hab gedenkt im 2021, Covid waerrd vorbei…ich hab net recht ghatt. Ya, die Grankheit iss noch do, un ass ich des Brief schreib, sin die Nummer do in Pennsylvania widder am nuffgraddle.

Awwer liewer Belsnickel, wie bischt du? Bischt gsund? Hoscht du die Vaccine grickt? Du wuhnscht dief im Busch, un vielleicht weil du net so viel Leit sehnscht, musscht du es net griege. Awwer wann du die Leit des Winder bsuchscht, vielleicht settscht du en Mask waere?

Alle Yaahr schreib ich dir en Brief. Usually, schreib ich en Lischt vun was ich hawwe will. Un ya, ich waerr mei katze Lischt am End schreiwe, awwer aerscht will ich glee bissel mit dir schwetze. Hoscht du en Guckbax odder die Internet do in deim gleene Haus? Wann nee, vielleicht bischt du gscheiter ass uns. Die Welt un unser Land hot glee wennich Druwwel im 2021 ghatt. Die Pandemic waar noch am laafe, unsres Bolitische System iss gebroche, es fiehlt sich ass nimmi kenne enanner verdraue. Wann ich die Guckbax guck, muss ich yuscht mei Kopp schiddle. Dann wann ich uff Facebook un die Internet geh, muss ich widder mei Kopp schiddle. Die Leit sin allsfatt am fechde…mannichmol mit Wadde un mannichmol mit Flinde. Was meh kann ich saage? Vielleicht kannscht du glee bissel Fried un Freed des Yaahr rumrschpritze?

Du weesscht ass ich arrig gut des Yaahr waar, so, liewer Belsnickel, do iss mei Lischt fer dich fer des Yaahr:

1. En neier Schtrohhut – mei alde Schtrohhut hot bessere Daage gsehne. Es hot schunn ee paar Lecher drin….dann kummt die Sunn rei un dann kann ich net recht seh.

2. Duwack fer mei Peif – im Summer hock ich mich gaern uff mei Bortsch un schmok mei Peif. Dann kumme die Schnoke net verbei! Awwer, sei so gut un mach es siesse Duwack, mei Fraa gleich des zu rieche.

Die zwee Dinge sin fer mich persehnlich. Nau hawwich en katze Lischt vun Dinge die net fer mich sin:

1. Fried – ya ich weess, sell iss glee wennich kischblich awwer ich meehn es. Unser Land, wie ich frieher gschriwwe hab, hot viel zu viel Schtress un Tenschion. Viel Leit brauche Fried un Schtillheit.

2. Esse un Gleeder – die zwee Dinge winsch ich fer all die Leit die sie brauche. Es gebt viel Leit in unser Land die net genunk Esse un net die rechde Gleeder hawwe, abaddich nau im Winder.

3. Gudes Wedder – im 2021 hot es viel schlechdes Wedder in unser Land gewwe. Wildfeier, Drickning, Flut, Hurricanes, un arrig hoch Tempetschers. Kannscht du glee bissel mit Mudder Nadur schwetze? Vielleicht 2022 kennt glee wennich besser sei. Die Bauere brauche meh besseres Wedder um unsere Esse zu bauere!

Well, ich glaab sell iss genunk fer des Yaahr. Wann du zu meim Haus vorbeikummscht waerr ich eppes uff dem Kichdisch fer dich hawwe. Yuscht glee wennich zu esse un zu drinke so ass du net bamblich fer dei Nachtrees bischt.

Ich winsch dir en hallicher Grischtdaag un en glickseliges Nei Yaahr 2022!

Mach’s gut,
– Der Doug

Do iss en Audio Klip: