Dem Gott sei Bauerei!

Guder Daag Blog Leser! Ass viel vun eich schunn wisst, bin ich Ludderaner. Am Sunndaag waar ich widder in die Karrich un mir warre am singe. Es Lied, es mir am singe waarre, waar “Gross iss dei Gedreilichkeit” – en gudes Lied. Uff de naegschde Blatt waar en annere Lied: “Gott, sei Bauerei iss all Schepfung.” Ich hab Gott un Bauerei gelese un hab graad en Verbinnung gemacht. Dann hawwich die Vaersch gelese…die Bilder die die Wadde gemacht hen, hen mich graad an uns Deitsche gedenkt. So ich hab mich vorgenumme es Lied uff Deitsch zu iwwersetze. Die Melodei vun em Lied iss “Harvest Gifts” gschriwwe vun dem Larry J. Long un die Wadde sin vun dem John Arlott gschriwwe. In es neie Ludderaner Liedbuch kann mer es Lied uff Blatt 734 finne.

Dem Gott sei Bauerei!

Gott, sei Bauerei iss all Schepfung,
nemm die Dankbaarkeit mir gewwe;
nemm die Bescht vun unsre Aerne,
die Kropps mir bauere,
so ass mir lewe daerfe.

Nemm unsre Blugerei, Kannerei, Schneiderei,
Hoffning un Bang vun Sunn un Regge,
All unsere Denke, Blanne, Waarde,
gezeidicht in des Obscht un Frucht.

All unsre Arewet, all unsre Lauer,
all unser Kalenner vun Acht
in die Kropps vun dei Schpefung,
Nemm, O Gott: sie sin unser Gebet.

En Bauerei iss so en wichdige Symbol fer uns Deitsche. Unsre Voreldere hen datt gelebt, gewuhnt, geschafft, un gebet. So wann ich des Lied gelese hab, hawwich gemisst es uff Deitsch zu iwwersetze. Mei Voreldere waare all Bauer un gut Grischtliche Leit. Des Lied iss en Lied fer sie.

Do iss en Audio Klip: