In der Karrichhof!

Guder Daag Blog Leser! Well, naegschde Wochend iss Gedechtnisdaag do in Amerikaa. Ich, mei Fraa, un mei zwee Kinner waerre nooch Heem faahre um mei Familye zu sehne. Yeder Gedechtnisdaag Wochend geh ich uff viele verschiddliche Karrichhoffe fer Blumme uff em Greewer zu schtelle.

Selles Yaahr gehne mir zu de normal Greewer un ee paar annere aa. Meim Grossdaadi Madenford sei Eldre sin in Shillington begraabt. Mir gehne datt alle Yaahr. Dann sin mir nooch Molltown gange fer meinre Grossmudder Madenford (nee Hoch) ihr Grosseldre, Eldre, ihr Bruder, un mei Mudder zu bsuche.

Ee paar Yaahre zerick hawwich viel Geneology geduh un ich hab viel vun meinre Voreldre gefunne. Zerick im 2012 hawwich viel Karrichhofe bsucht. Mei Gross-Gross-Grosseldre (Eckenroth) uff mei Grossdaadis Seide sin in en alde Karrichhof in Reading begraabt. Mir sin schun dattgange um sie widder zu finne. Fer schurr hemmer sie gefunne, awwer die Karrichhof waar net so schee. Viele Graabschtee sin iwwergfalle un die Grass waar aa net so gut gemaeht. Sell finn ich arrig schlecht, awwer was kann mer duh?

Nooch unser Rees darrich Reading sin mir nooch Virginville gfaahre. Datt sin mei Gross-Gross-Grosseldre (Fegely) vun meinre Grossmudder begraabt. Sie sin in Dunkels Karrichhof begraabt. Selle Karrich is nix meh. Die Karrich iss datt awwer die Gemee iss schunn lang fattgange. Die Karrichhof seht gut aus, awwer die Karrich net so viel. Sell hawwich drauerich gefunne, en alde Karrich, un kee Gottesdinscht meh.

Mir sin aa in ee paar alde Karrichhoffe gange, die so alt waare, ass sie viel Graabschtee aus em 1700s ghatt hen! Viel vun die Graabschtee waare in Hochdeitsch gschriwwe. Ich hab viel Greewer vun Revolutionary un Briedersgrieg Soldaade gsehne. Nadierlich, hen sie all ganz neie Faahne newwe sie ghatt.

Ich gleich arrig viel uff en Karrichhof rumzulaafe. Mer sehnt Gschichte, alde Naame un alde Soldaade. Gleicht eich aa darrich en Karrichhof zu laafe?