Die Deiwelszeit!

Guder Daag Blog Leser! Well nau sin mir im Matz…der Winder iss noch drausse awwer es Friehyaahr schniekt langsam nei. Waremere Daage, Blumme, griene Graass…ya sie alle waerre ball do sei. Weesscht du was aa ball do sei waerrd? Die Deiwelszeit! Yep, uff de 14. Matz gehne mir widder in die Deiwelszeit. Um zwee Uhr am Mariye misse mir unsere Uhre ee Schtund vorschiewe. Dann waerre mir widder in die Deiwelszeit sei. Dann im November tschumpe mir widder ee Schtund zerick.

Die Deiwelszeit iss zimmlich nei. Es aerschdes Mol fer es do in Amerikaa waar im Yaahr 1918, awwer der Ben Franklin hot es schunn im 18. Yaahrhunnert driwwe gebabbelt. Die Idea iss mit “Daylight Savings Time” kenne mir mehr Leckdrick schpaare. Die Sunn waerr lenger uff…es macht Sinn. Awwer fer die Deitsche Leit die am lewwe im 1918 waare, waare die neie Zeit schlecht un gege was Gott gemacht hot. Deswege hen sie “Standard Time” ass Gotteszeit benaamt!

Fer mich persehnlich iss die Zeit Wexling zimmlich hatt. Mei Kareber iss all verhuddelt fer ee paar Daage. Wie iss es bei dir? Aa so? Viel Leit do in Amerikaa saage es mir solle yuscht eefach uff die Deiwelszeit bleiwe un die Uhre net meh wechsle. In Arizona un Hawaii gebt ken Deiwelszeit, sie bleiwe uff Gotteszeit.

Es aerschdes Land es Deiwelszeit geyuust hot waar Deitschland im 1916! Darrich die Zwette Welt Grieg hot der Bresident Roosevelt gsaat ass Amerikaa waerrd uff Deiwelszeit bleiwe bis die Grieg am End waar. Im 1974 wann es Eel Druwwel waar hot Amerikaa Deiwelszeit fer en ganzes Yaahr geduh.

So was denkt eich? Gleicht dihr die Deiwelszeit? Solle mir unsre Uhre wechsle odder yuscht uff Deiwelszeit bleiwe? Loss mich mol wisse!

Do iss en Audio Klip:

7 thoughts on “Die Deiwelszeit!

  1. Bernd "Barny" Edinger 06/03/2021 — 14:11

    Des hann isch jetzt a noch net geheert, gefallt mer awwer – Gotteszeit un Deiwelszeit.
    Allo, wann du misch froosch, isch finn die Deiwelszeit gar net so schlecht. Isch hanns gern, wanns im Summer owends laenger hell is. Vun meer aus kennten mer’s ganze Johr Deiwelszeit hann.

  2. Jack Speese 06/03/2021 — 16:21

    Ich gleich die Zeitwexling iweerhaupt nit. Jedes Yaahr ass man elder waerd, iss’s immer schwerer fier zu adaptiere. Mir solle entweder aaf Gotteszeit odder Deiwelzeit bleiwwe un nit wexle.

  3. hi liewer Freind Douglas, bei uns im Alde Land is hawwe se s’erschde mol am 01. Mai 1916 die Summer/Winderzeit oigführt! von 1950-1979 war‘s abgschafft! Am 06.04.1980 wurd’s in Ost- un Westdeutschland wieder oigfiert bis heit! Hoffentlich werd’s endlich bald goanz abgschafft! Awwer die Europäer wehre sich noch degeje! Mach’s Gud und kummt iwwer die Deiwelszeit Umstellung gsund driwwer weg! Gruß bin Hiwwe noch Driwwe, 🤗Herbert

  4. Veilleicht kummt yo was in die Zukunft. Es gebt aa viel Leit do in Amerikaa die denke ass es aa Deiwelszeit es ganze Yaahr gewwe soll!

  5. Jack Speese 07/03/2021 — 13:06

    Ich bin mit dir eenich, Barney. Ich gleich’s aa, wann die Daage im Sommer laenger sinn. Was ich nit gleiche iss die Wexling/die Umstellung zweemol im Yaahr.

  6. Bernd "Barny" Edinger 07/03/2021 — 13:17

    Yo Jack,
    veschteh isch. Des geht viele Leit genauso.
    Awwer meer haenn noch e bissje Zeit, in Deitschland werd die Uhr erscht in de Nacht uff de 28. Maerz umgeschtellt.

  7. Matt McClenahen 08/03/2021 — 16:48

    Ich bevorzüge sech Monate Sommerzeit und sechs Monate Winterzeit wie es früher war, statt acht Monate Sommerzeit und vier Monate Witerzeit wie es jetzt ist.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

<span>%d</span> bloggers like this:
search previous next tag category expand menu location phone mail time cart zoom edit close