En Gschwetzt mit dem Punxsy Phil!

Guder Daag Blog Leser! As viel vun eich schunn wisst, Dinschdaag, der zwette Hanning, iss en abaddicher Daag fer uns Deitsche un fer en gleene Schteddel in Naddwescht Pennsylvaania. Ya, Dinschdaag iss Grundsaudaag. Frieh am Mariye in Punxsatawney, der Phil, die gut bekannte Grundsau, waerr aus sei Loch rauskumme un saag uns sei Wedder Vorherrsaage. All die Media, mit viel Kameras, waerre aa datt sei um ihn zu sehne. Des Yaahr mit Corona, waerrd es ken annere Leit dobei sei. Der Phil iss warricklich so en Celebrity. Eb ee paar Woch hawwich die Leit in Punxsatawny gschriwwe ob ich der Phil interviewe kennt. Zum Glick hen sie “YA” gsaat, un selles Woch hawwich via Zoom en Interview mit dem Phil ghatt. Do iss was mir driwwe gschwetzt hen:

Guder Mariye Phil! Ich bin so froh mit dir zu schwetze. Loss mich so aafange: wie waar dei Winderschlof?

Ya, guder Mariye! ‘Sis en grosse Blessier mit dir aa zu schwetze! Ich les dei Blog un gleicht es aarig viel…un dei YouTube Channel iss aa arrig gut. Ya, mei Winderschloof waar gut awwer wie immer, zu katz. Bevor ich in mei Loch gegraddelt bin, hawwich en grosse Party mit all mei Freinde ghatt, wie immer. Awwer des Yaahr hemmer unsre Masks aaghatt un mir hen uns socially gedistanced! En grosse Fan aus Lebanon hot mir letschdes Yaahr en scheener Blaenket genaeht un hot es zu mir zerick in Oktower gschickt. Ich hab sell des Winder geyuust un man waar es warm. So ich muss Gross Dank an die Verna Kellerfeich saage!

Letschdes Yaahr hot dir Recht ghatt. Congrats, awwer was saagscht du zu re Leit die saage: “Der weess gar net was er duht.”

Was kann ich saage? Es waerr allsfatt Unglaawiger gewwe. Ich kann duhe yuscht was ich duhe kannscht. Ich saag es Wedder wie ich es find. Wann Leit denke as ich dumm bin odder ass ich net
weess was ich saage, so iss es. Ich weess ass es gebt viel Leit die nemme was ich saage as die Waahrheit un sell iss gut genunk fer mich. Ich daet aa saage ass die Leit die net glaawe, sie sin arrig Willkumm dohie zu kumme un mei Tschopp fer ee Yaahr mache. ‘Sis net leicht! Awwer die waerre sell net aa duh. Manniche Leit gleiche yuscht zu grexe. So iss es un so waerr es allsfatt sei!

Was denkscht du vun all die Science as mir nau hawwe fer Wedder vorherrzusaage?

Ya, dihr Mensche sin arrig weit mit Technology kumme. Awwer, mannichmol sin die alde Wege graad so gut, wann aa net besser, ass die neie Wege, gell? Ich brauch ken Radar odder Digital Kaarte fer mei Tschopp zu duhe. Ich kann mei Antwatt in mei Gnoche fiehle….un mer soll unser Gnoche net iwwergucke. Dihr hett viel Technology, awwer ich froog eich: mache die Weddermannsleit ab un zu Fehler? Fer dausend vun Yaahre hemmer soddiche Technology net gewwe un mir hen iwwerlebt.

Hoscht du Blanne fer der Summer?

Well, ich hoff so. Wann die COVID vorbei iss, will die Fraa uff en Cruise geh. Fer die letsche paar Yaahre hawwich Commercials fer die Pennsylvaania Lottery gemacht. Sie hen mich zimmlich gut dafer bezahlt. So ich denk ‘sis Zeit ee paar Dallers auszugewwe. Im Moi gehne mir nooch Florida un dann uff en grosse Boot in die Caribbean fer 10 Daage! Dann in Tschulei will ich mei Cousin in Nadd Dakota bsuche. Er wuhnt net so weit Weg vun en grosse Schteddel vun Prarie Dogs. In Tschulei gebt es en grosse Myusik Fescht datt un ich will es sehne. Mei Cousin saagt yedes Yaahr as ich datthie gehne soll, so endlich des Yaahr duh ich. Es soll gut sei, awwer sell iss en langi Faahrt. Die sin grosse Blanne, un wann COVID net vorbei iss, dann muss ich yuscht daheem bleiwe un mei Netflix in my Loch gucke.

Du bischt en Symbol fer Pennsylvaania un aa fer uns Deitsche, wie fiehlscht du dich iwwer sell?

Ya, ich bin. Weesscht du, normally wann ich rauskumm, ‘sis wie en Blitzschtaerm! Ich fiehl mich ass ich uff der rote Karebet bei de Oscars bin. All die Kameras waerre am blitze sei un Leit waerre greische: “Phil, Phil, Phil! Mir liewe dich Phil! Guck mol do, Phil!” ‘Sis warricklich eppes. Des Yaahr waerrd es viel ruhicher sei, awwer ich waerr noch uff em Guckbax sei, so ich kann mei Fans net nunnerlosse. Awwer, Doug, loss mich des saage: ich bin yuscht en Grundsau aus Pennsylvaania. Ich duh mei Hosse aa ee Beh uff ee mol. Ich bin net anners vun eich. Ich duh mei Tschopp un am End es Daag bin ich graad wie all die annere Grundsei, un ich bin OK mit sell. Wann ich Fried zu alde un yunge Leit bringe, sell find ich gut.

Gross Dank Phil fer des Interview. Es waar en grosse Blessier mit dir zu schwetze. Ich winsch dir Gut Glick fer Dinschdaag! Bevor ich geh, soll ich mei Schneeschipp wegduh odder raus losse?

Doug, du musscht bis Dinschdaag fer selle Antwatt waarde! Mach’s gut!

Do iss en Audio Klip: