Schul in 2020 – en Ufffolye!

Guder Daag Blog Leser! Eb ee paar Woch hawwich en Poscht iwwer es Schulyaahr 2020 gschriwwe. Ich hab gsaat ass mei Students hen die Wahl ghatt um heem zu bleiwe un uff die Waddefresse zu lanne odder in die Schul zu kumme um “Gsicht zu Gsicht” zu lanne. Well, nau hemmer vier Woch gschafft….un mei Gott was en Erfaahring.

Am Aafang waar die Regel schtarrick ausgelegt un aa so an all die Leit verzaehlt: Masks, yuscht ee Weg in die Geng zu laafe, Social Distancing, nix mitenanner deele. Ich waar zimmlich froh ass mei Schul alles so gsaat hot. Awwer so iss es mannichmol im Lewe…was mer saagt un was mer dutt sin anners. So iss es bei mir gange.

Ya, die aerschde paar Woch waare die Students un annere Uffgewaxener gut behaevt. Awwer nau noch vier Woch sin die Bossdaage vorbei. Viel mol am Daag muss ich zu epper saage: “Duh dei Mask aa!” odder “Net so naegscht!” odder “Wesch dei Hend!”

Der Druwwel bei mir iss wu ich schaffe, gebt es so wenniche Cases vun COVID-19 ass so viel Leit denke ass net “Echt” iss. Ya, mir kenne es net sehne, awwer ‘sis noch allsfatt do. Yesus hot gsaat: “Seelich sin die, wu net sehne un doch glaawe.” In der naegschde Kaunty gebt es viel Leit die Grank sin….awwer fer viel Leit bei mir saage: “Well, des iss en annere Kaunty, net wu ich wuhn.” Die Leit saage des un dann saage es aa ihre Kinner in die Schul. Aye yummer bin ich mannichmol wiedich deswege.

Aa, bin ich mied im Kopp. Yede Klaess hawwich 80% die Klaess in die Schtubb un baut 20% Online. So ich muss die ganze Zeit allsfatt uff beide Drupp denke un Acht gewwe. Sell iss net leicht zu duh. Un wann es Druwwel mit der Technology gebt….aye yummer dann muss ich mol fluche. Yaunse, Grexe, un Beglaage kann ich viel awwer es bringt nix. Muss eefach mol weider schaffe.

Yede Daag geh ich in die Schul un ich bed ass ich die COVID “Keffer” net grickt. Liewe Leit, winscht ich Glick, oh, un wann du glaawig bischt…saag en katze Bed aa sei so gut!

Do iss en Audio Klip: