Wenger Meeting House Gottesdinscht!

Guder Daag Blog Leser! Letschde Sunndaag waar ich eigelaade die Breddich an em Wenger Meeting House sei 7. Yaehrliche Pennsylvaanisch Deitsch Gottesdinscht zu gewwe. Ich hab es im Yaahr 2017 gewwe, un ich waar arrig schtolz un demiedich ass ich widder eigelaade waar. Do iss was ich gsaat hab. Viel Gschpass bei lese. Es gebt aa en Video vun mir ass ich die Breddich gewwe hab.

Wenger Gottesdinscht – 13 September 2020

Es heiliges Schrift kummt aus em 20. Kabiddel es Evangelium vun Yohannes:

Un Oweds an sellem aerschde Daag vun der Woch, wie die Yinger versammelt waare un die Diere verschlosse waare, weil sie Bang ghatt hen wege de Yudde, iss Yesus middes unnich sie reikumme un hot ne gsaat: “Friede sei mit eich.” Un noochdem ass er des gsaat hot, hot er ne sei Hend un sei Seit gewisse. Un die Yinger waare froh, ass sie der Harr gsehne hen. Un Yesus hot noch ee mol gsaat: “ Friede sei mit eich. So wie der Vadder mich hergschickt hot, schick ich eich hie.” Un noochdem, as er des gsaat hot, hot er uff sie geblose un hot gsaat: “Nau nemmt der Heiliche Geischt. Wann ihr die Mensche vun ihre Sinde freischpreche, warre sie ihre Sinde los, un wann ihr die Mensche in ihre Sinde drin losse, behalde sie ihre Sinde. Awwer der Thomas, eener vun de Zwelf, as der Zwilling heesst, waar net bei ne, wie Yesus zu ne kumme iss. Noh hen em die annere Yinger gsaat: “Mir hen der Harr gsehne.” Awwer er hot ne gsaat, “Aerscht wann ich die Naggellecher in sei Hen sehn un mei Finger datt neiduh un mei Hand in sei Seit neischteck, kann ich’s glaawe.” Un ee Woch dennoh waare sei Yinger noch ee mol drinne un desmol waar der Thomas aa debei. Noh kummt Yesus, fer all ass die Diere verschlosse waare, middes unner sie rei un saagt: “ Friede sei mit eich.” Dann saagt er zum Thomas, “Geb dei Finger her. Guck mei Hend aa un lang dei Hand her un schteck sie in mei Seit nei. Un nau sei net unglaawich awwer glaawich.” Der Thomas hot em geantwatt, “Mei Harr un mei Gott!” Yesus saagt zu ihn, “Weil du mich gsehne hoscht, Thomas, glaabscht du. Seelich sin die, wu net sehne un doch glaawe.” 

Das Watt der Heilige Schift.

Loss uns bede……Liewer Gott, loss die Wadde vun unsere Leftse un die Gedanke in unsere Hatze sei ewig in dei Naame. Amen. 

Guder Daag liewe Leit. ‘Sis en abselutt Blessier und Segne, um do mit eich seller Nummidaag zu sei, un mit eich zu aabeede in unsere scheeni un so wichdige Mudderschprooch, Pennsylvaanisch Deitsch. 

Un Oweds an sellem aerschde Daag vun der Woch, wie die Yinger versammelt waare un die Diere verschlosse waare, weil sie Bang ghatt hen wege de Yudde, iss Yesus middes unnich sie reikumme un hot ne gsaat: “Friede sei mit eich.”

Die Diere waare verschlosse weil sie Bang ghatt hen wege die Yudde. Vielliecht fer uns in Matz, Abrill, un Moi des Yaahr kennte mir saage: Die Diere waare verschlosse weil sie Bang ghatt wege die Coronoa Virus. Ya, selles Yaahr sin mir wie die Yinger in de Daage nochdem Greizung vun Yesus. 

Mir alle waare heem, hinnich verschlossene Diere, un viel vun uns hen Bang ghatt. Leit waar grank, manniche waare am schtarewe, un der Virus waar eppes ass mir net warricklich sehne kennte. 

Yesus iss zu de Yinger kumme, graad darrich die verschlossene Dier, un hot gsaat: Friede sei mit eich. Vier katze Wadde, awwer wichdige Watte. Im Friehyaahr, un aa noch heit, hemmer gege en Feind gfochdet die mir net sehne kenne. Fer viel Leit waar es, un iss es, net en leichte Fecht. Mir kenne Anxious fiehle, Hoffningslos fiehle, allee fiehle. Fer die Leit, saag ich: Friede sei mit eich.

Unser Lewe hen sich arrig verennert. Mir kenne net in en Restaurant geh, mir kenne net so eefach in die Movies geh. Mir kenne net so viel Zeit mit unsre Freindschaft rumbringe. Viel Schule sin verschlosse, un die Kinner misse daheem uff ihre Laptops lanne. 

Fer die Yinger waare es aa so. Sie hen gsehne ass die Reemer un die Yudde Yesus weckgenumme hen, ihn var Pontius Pilot gebrocht hen, un endlich am Freidaag er uff en Greiz genaagelt hen. Ihre Lewe waar aa schtarrick verennert. Sie hen net gewusst was zu duh. Vielleicht fiehlscht du aa so mannichmol? 

Awwer in die dunkele Zeite, wie die Yinger in de Woch nochdem Kaarfreidaag, odder wie uns in unsere Zeite vun Corona un en verschpliddede Election Cycle. Yesus kummt noch, darrich die verschlossene Diere un saagt: Friede sei mit eich. 

Nix kann ihm drausshalde. Net verschlossene Diere, net die Corona Virus, net die Republikaaner, net die Demokraate, nix. Er waerr allsfatt darrich die Diere kumme. 

Un wann du Bang hoscht, odder weesscht net was zu duh, dreht dich um, datt waerr er sei, un er waerrd aa zu dir saage: Friede sei mit eich. 

Amen. 

Do iss en Link zu en Video: https://youtu.be/zwoafuVq24E