Guder Daag Blog Leser! Des Gschicht waar aerscht gschriwwe in die Reading Eagle Zeiding uff der 2. Tschulei 2020. Ich find die Gschicht so inderessant, so ich hab es iwwersetzt. Viel Gschpass bei lese!
Reading’s allebekannt Madam “Dutch Mary” hot gholfe en Mob-run Hurerei Ring nunner zu bringe.
gschriwwe vun Michelle Lynch (Pickders aa)
iwwersetzt vun Douglas Madenford
“Halt!” die Sentry hot gsaat ass en yunger Private vun Reading hot browiert en Amerikaanischer Encampment uff der Western Front neizugeh. Welt Grieg II waar schier gaar vorbei in Europe, un die Allies waare gefaricht vun Hochdeitsche Sabotage. Der Guard hot yede Vorsicht genumme um Leit zu kenne. Er hot sei Dog Tag noochgezaehlt. Sei Dog Tag hot sei Heemet un sei Naame druff. Der Guard hot gsaat ass er aa aus Reading kummt un kennt net schtoppe mitaus en letschde Security Measure zu nemme.
“Wer iss Deitsch Mary?” hot er gfroogt.
Es waar en Froog as yuscht en echde “Local” antwadde kennt.
En Schmunsel breidet sich iwwer dem Soldaate sei Gscicht un sei Backe sin rot gewore. Der Guard hot graad gewusst ass der yunge Soldaat waar aus Reading. Allebeed hen Deitsch Mary gekennt ass die Schtadts allebekannte “Madam,” die Mary Gruber.
Die Corrie Crupi-Zana erzaehlt weider. “Der Mary ihre Gschicht waar eens vun Corruption, Seduction, Schmiere, un Liege die darrich die Soldaate vun dem aerschde un zwette Welt Grieg schpannt un aa in die Bicher vun der FBI.”
Crupi-Zana vun St. Lawrence hot viel Bicher iwwer Barricks Kaunty Gschichte gschriwwe un hot viel Research iwwer Deitsch Mary geduh. “Reading Buwe heem uff Furloughs hen gewusst graad wu zu geh mitaus en Phone Call zu mache,” hot sie gsaat. “Sie hen die Rot-Licht Bus zu Fimfte un Penn Schtrooss in de Mitt vun re Schtadt genumme.” Vun datt waar es yuscht ee paar Schritte bis zu Mary ihr Plum Schtrooss Hurehaus.
Sieese Goddeslieb
Katz, blump, un freindlich, die Madam waar gut bekannt fer ihre Goddeslieb un aa fer ihre Hurehau, die Crupi-Zana hot gsaat. Bei Grischtdaag, die Mary hot hunnert Dollar vun Schuhe un Gleeder gkaaft vun die Schtores uff Penn Schtrooss. Dann waerrd sie zu aarme Leit schenke. “Es waar normal ‘die Maedels’ zu sehne ass sie Kaereb voll mit Esse an aarme Familye ausgewwe.” Es waar gsaat ass die Mary ihre Maedels gut behandelt hot, Crupi-Zana hot gsaat, Esse, Gleeder, un en Heemet gewwe, un aa fer normal Medical Care bezaahle.
Die Mary hot viele verschiddliche Aliases geyuusst. Variations uff ihre leddicher Naame, Steffey, un ihre verheiradete Naame, Quinn, aa Gruber un annere Familyenaame kenne in Zeiding Artikel finne. Awwer all ihre Aliases kennte net ihre schwere Pennsylvaanisch Deitsche Akkzent verschtecke, die Crupi-Zana gsaat hot.
Es aerschde Mol mit em Gesetz vun Barricks Kaunty waar in Matz 1902, sie waar mit Hurerei uffgschriwwe un waar drei Munet in die Kaunty Tscheel. Nooch ee paar Yaahre waar sie widder sex Munet in Tscheel uffgschriwwe un hot gemisst $10 zu bezaahle. Nooch en Ardickel in die Reading Times vun 21. September 1908: die Mary waar uffgschriwwe fer en ‘disorderly un bawdy’ Haus…allebeed Watte waare en Euphemisms fer en Hurehaus, die Mary Gruber, alias Mary Steffy, hot aa gemisst Bail zu bezaahle un hot verschproche en Yaahr vun ‘good behavior’ zu hawwe. Mir wisse net ferwas die Mary so en Lewe zu fiehre awwer die Crupi-Zana denkt ass es waar en Rebellion gege ihre schtrenge Eldere.
Ihr friehe Lewe
Deitsch Mary waar ass Mary S. Steffey uff 23. Abrill 1872 in East Texas, Lechaa Kaunty gebore. Sie waar een vun nein Kinner, acht Dechder un ee Soh vun de Ephraim un die Sarah (Eck) Steffey. Arrig glaawig, die Familye hen schpeeder in Langschwamm Taunschip gewuhnt un hot geholfe die Church of God uff Smith Schtrooss in Topton zu grinde.
Die Mary iss dann nooch Reading ass en Teenager gezoge un hot gschafft ass en domestic Servant fer viel reiche Familye, Crupi-Zana hot gsaat. Ihr Koche, Butze, un Wesche hot sie $5 ee Woch verdient, un die Mary hot endeckt ass es leichter Wege gewwe um Geld zu verdiene. En Hurehaus zu halde waar een vun weeniche Wege fer en Fraa vun de 19. un friehe 20,. Yaahrhunnert en Business Owner zu sei, Crupi-Zana hot gsaat. Un die Mary hot en erfolgreiche Business ghatt.
Es kann sei ass Mary hot mit der “Trade” aagfanage ass sie in Atlantic City gewuhnt hot, awwer mir wisse des net fer schurr.
Mir denke ass die Mary hot entwedder gheiert odder yuscht en Relationship ghatt mit en yunger Mann mit der Naame Gurber, Crupi-Zana hot gsaat, awwer ken Documentation iss gefunne. Mir wisse aa net ob er gschtarewe iss odder es Paar en Scheede ghatt hen, awwer uff der 13. Diesember 1907 Reading Times saagt: “der John D. Quinn, special officer, un die Mary L. Steffy, allebeed aus Reading, waare in Ellsdaun gheiert.” Der John hot fer die Reading Riggelweg gschafft un hot sei Fraa ihre Bisness gelidde. Uff de 19. Tschulei 1915, die Mary hot der John dot gefunne in ihr Haus. Er waar 49 Yaahre alt un hot Selbschtmard gemacht. Er hot Carbolic Acid gedrunke. Die Mary waar verschtiwwert un hot vun ihr Haus (24 Plumm Schtrooss) zu en neie Haus (22 Plum Schtrooss) gezogge.
Fer viel Yaahre, die Mary hot Hureheiser uff Plum Schtrooss, Cherry Schtrooss, un Franklin Schtrooss ghatt. Sie hot aa viel “run-ins” mit de Polis ghatt.
Mob Feud
Schpeet in ihre Career hot sie en Feud mit dem Racketeer, der Tony Moran begonne. Gebore, Anthony Mirenna, Moran waar der “Poster Bu vun re Schtadt Vice Crowd,” Ed Taggert, en Schreiwer hot in sei 2008 Buch “When the Rackets Reigned,” gschriwwe. In 1945 der Moran waar gschosse vun en Rival, un zu der Zeit hot er 15 Properties in die Schtadt un Kaunty geeegent un eens devun waar een vun er Mary ihr Hurehaus uff Cherry Schtrooss.
Viel vun die Leit die Moran’s sudd-vun-Penn Gambling Parlors bsucht hen, hen aa Mary ihr Haus bsucht. In de 20s un 30s, der Moran hot die Mary verlangt “Protection Money” zu bezaahle, awwer die Mary hot allsfatt ‘nee’ gsaat. Der Moran hot aa sei eegne Hurering ghatt awwer mit Weibsleit aus annere Schtaate. Die Mary hot gewollt nix mit so was zu duh. Die Mary hot allsfatt ‘Locals’ Arewet gewwe. Un Mary ihre Maedels daerfe rausgeht wann sie gewollt hen. Der Moran waar arrig bees deswege un hot sei Thugs gsaat ass sie Mary glee bissel Druwwel gewwe solle. Es waar dann ass die Mary vorgenumme hot mit re FBI zu schaffe.
Schaffe mit re FBI
Die Mary aerschde FBI File waar in Oktower 1937, wann die Schtaat Polis hen Federal Agents gsaat ass die Mary mithelfe waerrd. Die File saagt ass die Mary viel Information gewwe hot, die ganz hilfreich waar.
In ihre letschde Yaahre, die Mary hot ihre Heiser verkaaft un hot mit ihre Schweschder uff South Eighth Schtrooss gewuhnt. Uff de Nummidaag vun de 14. Aagscht 1959, die 87 Yaahr Alt Madam hot mit Freinde in es Stork Hotel uff Eighth un Bingaman Schtrooss ghockt. Sie hot sich net so gut gefiehlt un die Freinde hen fer en Ambulance gerufe. Ass sie datt am waarde waar, hot die Mary vun ihr Barschtuhl gefalle un en Schtadt Detective hot sie gfange. Ironically, sie hot in die “Arms of the Law” gschtarewe.
Schier gaar yede Paerson die in Barricks Kaunty die eb Welt Grieg II gelebt hot hot Deitsch Mary erinnert. “Sie waar en Institution,” Crupi-Zana hot gsaat, “Beflocke, ya, awwer en groosse Neez in der Schtadt ihr Wanddeppich.”
Do iss en Audio Klip:
PA Dutch 101 
1 thought on “Deitsch Mary!”