En COVID-19 Gedicht!

Guder Daag Blog Leser! Des Mol bring ich widder eppes vun en Gascht Schreiwer. Viel vun eich kennt der Patrick Donmoyer schunn. Der Patrick iss der Director fer die PA German Cultural Heritage Center in Kutztown, PA. Er schreibt aa viel iwwer Scheier Schtanne, Braucherei, un Graabschtee. Der Bu weess arrig viel iwwer die Kuldur un Gschicht vun uns Deitsche. Wisst dihr aa ass er en guder Gedicht Schreiwer iss? Sell iss awwer Waahr. Heit schenk ich eich sei neiischdes Gedicht:

Neie Wattcher
En Covid-19 Gedicht
vun dem Patrick Donmoyer

Ich muss es aaduh alledaag,
Doch weess net was es heest.
Es halt mich sicher so es saagt,
In alles was ich lees.Ich will mei Dudi fleissich duh,
Fer Noochbre gsund zu sei,
Un hoff mei Noochbre all dezu
fer mich aa Gsund dabei.Doch schtimme mir mitnanner ei,
Baut was des Ding yo heesst?
Mir henn ken Watt in unser Schprooch,
Ya gaar net, ass ich wees.

Wann mir dawegge schwetze, well…
Was Watt benutz ich yetzt?
Un welle Watt hoscht aa geyuust,
So weess was d’wegge schwetzt?

En Paar Eidie kumme mir im Sinn,
En Glitzer in meim Aag,
Wann ich viel neie Wattcher mach,
verschtehst mich wann ich saag…?

En Mauli-Deckel?
Gfress-Beschitzer?
Gsicht-Gewickel?
Gege-Schpritzer?

odder…

Gosch-Verschlupper?
Riesel-B’wahrer?
Raffelgsicht? – nee,
Fresser-Karrbe?

vieleicht…

En Mund-Umschleckel?
Naase-Hut?
en Schnabbel-Seckel?
Schpucke-Dutt?

Nee, nee…

En Latz-verschteckler?
En Schnaaze-Turm?
En Rotz-Bedeckler?
En Schlupploch-Schirm?

Ach, well…

En Aadem-Schild?
En Schnudde-Saufer?
En Hauch-Zuhalder?
En Wedder-Schnaufer?

Well, nau…

Vieleicht ‘s iss besser net aafange
Fer so en halbgscheidt Taesk,
Ferhuddelte fremme Wattcher mache,
Saag mol yuscht en “Fees-Maesk”!

20200713_141959
Der Patrick mit sei          Fees-Maesk!

Do iss en Audio Klip:

1 thought on “En COVID-19 Gedicht!

  1. Jack Speese 19/07/2020 — 15:05

    Ich finne die Wadde Rotz-Bedeckler un Schpucke-Dutt besonders luschdig LOL!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this:
search previous next tag category expand menu location phone mail time cart zoom edit close