Druwwle!

Guder Daag liewer Blog Leser! Ass ich des schreib, sin mir nooch mit re Coronoa Grankheit am fechde. Viel Leit darrich die ganze Welt sin grank un viel sin schunn gschtarewe. Do in Amerika iss alles in “Lock Down” un “Quarantine”. Ich glaab fer viel Leit, Druwwel un Angscht odder Bang sin uff de Meind fer viele. Mannichmol bin ich aa glee bissel zittrich deswege. Mei Grosseldere sin noch am lewe awwer sie sin allebeed elder as 90 un ich hab aa zwee gleene Kinner. Ich farich fer sie un die Grankheit. Weil viel Leit druwwle sich, hawwich gedenkt es waar en gudi Wahl des Gedicht mit eich zu deele. Es waar vun dem Edwin Gehman Weber im Abril 1982 gschriwwe:

Druwwle

Druwwle iss wie en Schockelschtuhl:
Halt’s uff fer en hunnert Yaahr,
Uff un ab wie en alder Fool,
Bischt als noch wu du waarscht davor!

Es batt nix! Es dutt ken gut,
Du sottscht ken Haus druff baue,
Die helft Zeit iss’s doch nix dazu:
Es iss besser fer glaawe un traue.

Mit Druwwle kummschde nariyets hie,
Es fresst ass wie en Schwaer.
Es schwellt dich uff mit bidderi Brieh,
Ass am verdawwere waer.

So grick Graft un guck in die Heh,
Wu die Sunn scheint un alles iss wohl.
No kannscht’s nemme wie’s kummt
Un fiehlscht besser alle Mol.

Geh net iwwer en Brick eb du datt bischt,
Leb yuscht ee Daag uff ee mol.
Leg dei Druwwel uff der Herr Yesus Grischt,
No iss alles gut un wohl.

So sell waar glee bissel Raat. Ich hoff ass eich gut un gsund sin. Duh was die Doktors saage: bleib eefach daheem. Zamme kenne mir uns es schwuppe.

Do iss en Audio Klip:

2 thoughts on “Druwwle!

  1. Christopher S Witmer 21/03/2020 — 11:03

    Druwwle es buchschtaawiert ‘Druwwel’, gel ?

  2. Druwwel ass NOUN, druwwle ass VERB.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this:
search previous next tag category expand menu location phone mail time cart zoom edit close