Guder Daag Blog Leser! Ass ich des schreib, iss es der 15. Matz 2020 un fer die Welt iss sell Corona Virus Zeit. Ich will en Poscht schreiwe domit ich en Regischder hab vun sell. Ich weess net eigetlich was zu saage. Ass viel vun eich schunn wisst, bin ich en Schulmeeschder. Am Freidaag hot der Governor Wolf do in Pennsylvaania gsaat ass alle Schule in Pennsylvaania zu sin fer die naegschde zwee Woch. Die Colleges sin aa zu un viel Gscheft sin aa zu. Viel Leit misse vun heem schaffe (wann meeglich). Die Grocery Schtors hen Sims die leer sin. Briwwibabier hot en Waert vun sei Gewicht in Gold. Mir hen net genunk Virus Tests do, hoffetlich waerr des ennere.
Es macht nix aus zu mir wu vun der Grankheit kumme iss. ‘Sis do nau, nau misse mir gege es fechde. Ich weess ass es gebt viel Leit die saage ass mir am Over-reacting sin. Ich weess net. Ich glaab ‘sis besser sicher ass Leed zu sei, gell? Ich hab schunn mit viel Freind in Europe gschwetz. Datt iss es schlimmer ass do in Amerikaa. Wann mir net eppes duhne, kann es aa so schlecht do sei.
Ich bed fer all die Leit die schunn grank sin, ich bed fer die Leit die bang sin, ich bed fer die Leit die ken Gsundheit Versicherung hen, ich bed fer die Dokder un Abwaardere, ich bed fer die Regierung Leit, ich bed fer die Leit die in die Grocery Schtors schaffe, un ich bed fer en schnelli Uffkumme.
Ich hoff ass alles mit eich gut geht. Was meh kann ich saage? Bleib gsund un macht’s gut!
PA Dutch 101 
Gross dank fer seller Gebet! Die menscht tseit wees mir net wos tsu du, oder denke, owwer, acht gewwe und wennich Bede iss en guder aaffange! Machs Gut, alliebber!
Danke !