Guder Daag Blog Leser! Letschde Woch hawwich en scheener Brief vun re Fraa Beam grickt. Ass viel vun eich schunn wisst, die Dorothy Beam, waar dem Richard C. Beam sei Fraa. Unglicklicherweis iss der “Herr” Beam im Yaahr 2018 gschtarewe. Alle Yaahr hawwich en Grischtdaags Kaart an de Beams gschickt um alles was Neies am geh in mei Lewe iss zu verzaehle. Die Dorothy hot en scheene Griess gschickt un aa en Zeiding Schnittling. Es waar en Copy vun Beam’s “Es Pennsylvaanisch Deitsch Eck” aus em “Shopping News Zeiding. Es hot en scheene Gedicht vun dem Paul “Papa” Horning mit dem Naame: En Lieblicher Daag. So en scheene Gedicht iss es, ass ich hab mich vorgenumme es mit eich zu deele. Gross Dank Dorothy fer es!
En Lieblicher Daag
vun dem Paul B. Horning
gschriwwe im Yaahr 1982
Ich kann gewiss net recht saage,
Was des so en lieblicher Daag macht.
Die Luft iss kiehl, die Wolke drieb,
Doch hab ich en lieblicher Daag bedracht.
Vielleicht waar es ass en fremmer Mann
zu mir gschmunselt hot un bringt die Sunn;
Vielleicht waar es aa yuscht wann
en Noochber iwwer die Schtrooss ruft
un frogt; “Wie geht’s dann?”
Ich antwatt: “Fei un wie iss es bei dir?”
Es maag sei ass daer lieblich Daag
kummt vun epper en Gfalle duh, so glee,
Gewiss net viel, yuscht die Hand gewwe,
ihn wisse losse as ich verschteh.
Nix hot’s gewwe, gewiss net viel,
ass ich abbaddich saage maag.
Dinger sin so wie gewehnlich gange:
Doch, O, des waar so en lieblicher Daag!
Do iss en Audio Klip:
PA Dutch 101 
So schee!!!!Dankschee!!!