Der Welschkannschtock!

Guder Daag Blog Leser! Well, der Summer laaft graad un fer uns do in Pennsylvaania, sell meehnt ass es Welschkannbaschtzeit iss. Ya ya, geschder hawwich Welschkann vun mei Gaarde gepickt un nadierlich hawwich es gebascht. Dann bin ich reikumme un hab des Gedicht gelese. Ich hab gedenkt ass es gut waerr fer eich es aa zu lese. Des Gedicht waar im 1947 vun dem Victor Dieffenbach aus Bethel, Barricks Kaunty, gschriwwe.

Der Welschkannschtock

O, Welschkannschtock, O, Welschkannschtock! Du bischt so schee un grie. Du schiesscht so schtarick in die Heh. Wu witt du dann endlich hie?

Du gehscht druff los en katzi Zeit, ass wie en wilder Fill. Du waxscht net immer ass wie heit – du schtehscht noh ruhich un schtill.

Der Faahne schweebt hoch in die Luft; dei Watzle dief im Grund. Zwee Kolwe schiebscht du owwe nuff – du bischt vun Hatze gsund.

Dei Kolwe die sin gehl wie Geld; des Welschkann des watt deier. Sie kumme ee Owed raus gerollt an die Schtrippmaetsch in de Scheier.

Deel Kolwe die sin rot wie Blut; mer kann sich druff verlosse. Ass sell noh all die Buwe ‘suut’ – sie duhne die Maed noh bosse.

Ich denk’s bleibt so, so lang mer lebt; die Insching hen’s schunnt ghadde. Un wann’s lauder rode Kolwe gaebt – well, es Bosse daed nix schaade.

Die Schock die schtehne draus im Feld, in Roihe wie Soldaade. Sie kumme vun allem Eck der Welt – die Buwe un die Maade.

Sie schtrippe bis schpot in die Nacht, sie singe un sie lache. Sie mache en wunnerbaari Yacht – duhn wunnerbaare Sache.

Ich kann ken Kolwe schtrippe meh – mei Finger sin schteif un grumm. Mei Fiess die schtehne newe naus – mei Ohre bable rum.

Awwer wann ich bissel yinger waer, un hett paar scheene Hosse, noh daed ich an die Schtrippmaetsch geh, un daed die Maed aa bosse.

En alde Tradition saagt ass wann mer am Welschkann batsche/schtrippe iss un mer findt en Kolwe die rot iss, muss mer epper bosse. Ich wunnere mich wie die alde Welschkann geguckt hen. Heitzudaage hemmer unsre Welschkann mit Science verennert. Es gebt net so viel rode Welschkann net meh. Un die Idea vun en Welschkannbaschde Party find ich aa cool. Vielleicht waerr uns net so viel Druwwel in unser Land hawwe wann Leit zamme kummt um zammezuschaffe, gell? So denk ich.

Do iss en Audio Klip:

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this:
search previous next tag category expand menu location phone mail time cart zoom edit close