Die Sanftmiediche Waerre die Erdreich Bsitze!

Guder Daag Blog Leser! Des Mol bring ich widder en Schtick vun en Freind vun mir, der Kevin Sterner. Der Kevin iss en arrig gude Deitsche Kall un er kann so gut schreiwe. Do iss sei Schtick vun dem Kutztown Folk Fescht Schreiwer Fescht:
En hergsaat Gedanke in Pennsilfaanisch Deitch Schreiwes iss immer ass unseri Mudderschprooch am Schtarewe iss. Gewiss, eens vun de friehschde Schreiwer, der Parre Heinrich Harbaugh, hot zu schreiwe aagfange wann sei Freindschaft hot ihn aabefohle fer eppes in Deitsch nunnerzuschreiwe, eb es ewichlich vergange waar. Viel vun unser beschde Schreiwer henn die seem Ursach ghadde.
Awwer eppes Kariyos ghaeppent hot, eb Deitsch doot warre iss: heit iss Pennsilfaanisch Deitsch schtarrich am Waxe, schtarricher ass eenich anner Schprooch im Welt. Wie der Deihenker kummt des? Well, es gebt zwee Ursache. Zaerscht, die Amische un Mennischde Leit henn viel meh Kinner ass wie eenich annere Leit. Zwett, die Kinner net yuscht iwwerschteh, awwer sie halde in ihre Gmeeschaft dezu aus. Ihri Schprooch iss en wichtich Schtick vun sell.
Heidesdaags, wann ich Deitsch schreiwe, schreib ich fer en grooss Leserschaft in die Zukunft.
Nau, wann ihr ganz iwwerfalle waert, do iss eppes Anneres iwwerzudenke.
Die bleene Leit henn unser neigfangelt Aarde verschtosse, ass sie zu weltlich sinn. Sie bleiwe mit schlichder Aarde debei, ass wie uns faensi Leit. Awwer des gebt en sunderbaar Erfolg.
Die schlichde Aarde–die alde Aarde–sinn zu so Sache ass es Land, die Yaahreszeide, es Wedder, Vieh, Fruchde, un Scheier gebunne…grindlich, fiehlbaare Sache. Dings vun der reel Welt. Mir faensi Englische Leit bekimmer uns mit was Satt Sache? Mit immermeh eibildische Sache: Rechelmaschiene Schpiele, kinschtlich Verschtand, scheinbaari Waerklichkeet, Gfressbuch, Twitter, Rechelmaschiene-gemacht Drache on der Guckbax, unser 401Ks. Ya, mir, deweil mir weltlich sinn, ziege meh un meh vun der reel Welt weck, weil die unweltlich bleene Leit ruhichlich benniche sie.
Yesus vun Naazrett hot uns gelannt, “Seelich sin die Sanftmiediche, deweil sie waerre es Erdreich besitze.” Scheins sei Weissaaging iss die Waahret am Waerre.

1 thought on “Die Sanftmiediche Waerre die Erdreich Bsitze!

  1. Sven Sulzmann 20/07/2019 — 19:42

    Ferwahr ee arrig gude Beobachtung mer heitzedaagliche Leit brauche allerlei Maschiene fers Lewe. Des verblennt uns fer de eefache Freide. Awwer selle Maschiene sin aa nitzlich un helfe uns. Drache un Elbedritsche kenne freindschaftliche Aarde vun Gedier in re Vorstelling sin.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this:
search previous next tag category expand menu location phone mail time cart zoom edit close