Guder Daag liewe Blog Leser! Des Mol will ich en Gedicht mit eich deele. Wie ich yung waar, hen viel deitsche Bauereie nooch en Briwwi hinnich em Haus ghatt. Heidesdaages sin sie hatt zu finne. So en Erfaahring waar es yeder Daag die Bisness in so en gleene “Haus” zu duh. Der gut bekannte Dichder, der Edwin Gehman Weber (1904-1995), hot en arrig gudes Gedicht iwwer em Briwwi gschriwwe. Viel Gschpass bei lese!
Briwwi
Saag, weescht du noch vun en Briwwi, die seht mir nimmi heit?
Die Ursach iss die Baadschtubb fer alle Sadde Leit.
Des Briwwi waar en glee Gebei, hinne draus wann’s meeglich waar.
Zwee Sitz mit en Loch in yeder – en Halbmund rausgesaegt in em Door.
En Sears Robuck un Montgomery Ward Catalogue, net drin yuscht fer Gschpass.
Es waar gut fer yuscht drin rumgucke – un was noch! Kannscht denke fer was?
Die Englische heese des en Outhouse, weil sie kee Naame hen davor.
Die Englische hen viel Naame fer Gebeier, ass die Deitsche en bessere Naame hen davor.
Der Holzschopp iss en Wood House – der Seischtall iss en Hog House.
Der Hinkelkaschde iss en Chicken House – der Hunsschtall iss en Dog House.
Am Schulhaus waare zwee Briwwis gwest – eens fer Buwe un eens fer die Maed.
Mit en Bordfens auserum – wer-ewwer des sell verschteht.
Die Baadschtubb iss nau viel besser, du brauchscht kee Nachtkiwwel meh.
Sei froh das net naus musscht in die Kelt, wann der Bodde iss weiss mit Schnee.
* Do iss en Audio Klip:
PA Dutch 101 
Un sei froh dass du nit naus musscht in der Sommer, wann die Wespen een Nest unner der Sitz baue, Kreitzdunnerwetter!