PA Deitschland – en neies Land!

Guder Daag Blog Leser! Ich hab en Froog. Ferwas hen die Pennsylvaanisch Deitsche ihr eegene Land net? Mir solle. Weesscht, mir hen alles was mir brauche um unsere eegene Land zu hawwe. Noh denkt mol, fer en Land en Land zu sei, muss mer ee paar Dinge hawwe: Grense, en Haaptschtadt, en Schprooch, en National Anthem, un en Faahne. Well, liewe Leit, mir hen schunn all selle Dinge, gell?

Grense, nau wann mer uff en Landkaart vun Pennsylvaania guckt, kann mer ganz glaar Grense fer unsere Deitsch Land finne. Mir hen die Blohbarriye in de Nadd, Nei Jersey in de Oscht, die Susquehanna Rewwer in de Wescht un Philadelphia in de Sudd. Mir wisse schunn ass wann mer iwwer selle Grenze faahre, sin mir in en anneres Land. Wann mer naddich faahre, kumme mir in Kohl Country, datt esse sie Pierogies un Hulumpky, un schierr gaar all die Familyenaame hen -ski am End. In de Wescht, uff de annere Seite vun de Susquehanna gebt’s Weschtpennsylvaania, fer schurr en anneres Land. Datt sin viel Leit Scotch-Irish un sie sin ganz Schtolz uff ihr grosse Schtadt Pittsbarrick. Sie esse Sandwiches do mit French Fries gschwichich es Brot! Aye yummer yeah! Oscht vun uns gebt’s Nei Jersey. Datt sin die Leit warricklich anners ass uns. Aerschdens kenne sie net faahre. Ich glaab es gebt annere Regel fer faahre in Nei Jersey. Sie wisse net was en Blinker iss! Un viel vun ihne wuhne newwich die Ocean. Wie kann mer gude Welschkann blanze wann mer yuscht Sand hawwe? Un dann gucke mir suddlich. Unsere suddliche Grenze iss mit Philadelphia, die grosse Schtadt. Yaahre yaahre zerick sin unsre Voreldere datt uff die Schiffe vun Europe kumme. Awwer so ball ass sie aakumme sin, sin sie naddlich geloffe nooch Barricks un Lechaa Kaunties. Sie hen schunn gewisst ass es besser do sei waerr. Wann en gude Deitsche Leit nooch Philadelphia heit faahre, fiehle mir oft verlore. Grosse Gebei, zu viel Maschiene, laute Leit, un es gebt yuscht Mummers un Cheesesteaks! Nau, ich muss ehrlich saage, ihre Sportsteams sin awwer ok!

Fer en Land en Land zu sei muss es aa en Haaptschtadt hawwe. Noh mit sell bin ich nooch net sicher. Mir hen viel Schtaadt do in PA Deitschland wie Redding, Allentown, Lebnon, un Laengeschder. Awwer so en grosse Schtadt vielleicht iss net am bescht. Ich glaab en gleene Schteddel waerr besser fer uns. Deitscheleit sin normally net Schtadtleit. Mir fiehle meh daheem drausse uff re Bauerei. So vielleicht waerr Lenhartsville en gude Haaptschtadt sei? Ya, es iss newwich die grosse Schtross I78, hot en gude Essblatz, un en Butscher. Was meh brauche mir? Mir brauche ken grosse Schtadt weil unsre Regiering waerr aa glee sei. So en grosse Capitol Building brauche mir aa net. Die meeschde Deitsche Leit verdraue Boliticians net, so mir brauche net zu viele devun!

Yedes Land in re Welt hen ihr eegene Schprooch. Mannichmol iss es die “Official Schprooch” un mannichmol gebt es meh as yuscht eene Schprooch. Fer unsre neies Land, hemmer nadierlich en Schprooch, unsre scheene Deitsch. Mir hen es fer meh ass drei hunnert Yaahre do gschwetzt. Nau ich weess schunn ass net so viel Leit schwetze es nau wie frieher, awwer in unsre neies Land waerre mir es in die Schul lanne! Unsre Schprooch iss en grosse Deel vun uns. Un fer viele vun uns, iss es en arrig wichdige Deel. Mir schwetze, denke, singe, un schloofe uff Deitsch. Un mir hen so scheene Wadde wie Babbelmaul, Wunnerfitz, Schtopkeppich, un Hievahawwer. Wann Leit die net in PA Deitschland wuhne, dohie kumme, wisse sie sofort ass sie nau in en anneres Land sin, denn sie kenne uns heere Detisch am schwetze.

Noh en National Anthem, vielleicht waerr sell glee bissel hatt. Es gebt viel gude Deitsche Lieder, awwer gebt es schunn een die aa unsere National Anthem sei kennt? Vielleicht “Schnitzelbank” odder “Hei Li Hei Lo”? Der Druwwel iss ass sie gude Lieder sin awwer sie singe net iwwer unsre Land. Vielleicht soll epper een schreiwe? Uff sell misse mir nooch schaffe.

Endlich, fer en Land en Land zu sei, muss es en Faahne hawwe. Well, guck e’mol do, mir hen sell aa schunn. Ya, mir hen en scheene Faahne mit viel wichdige un wertvolle Symbols druff: en Schiff, en Keystone, en Kaerrich, en Blug, en Hatz un en Dullebaan, en Conestoga Waage un zuletscht en Deitsche Ausdruck. Weesscht ass mir aa schunn en Verschprechnis zu unsre Faahne gebt? Ya, der John J. Bensing hot’s gschriwwe. So geht es:

Ich bin schtolz vun unsre Pennsylvaanisch Deitsche Faahne, un aa vun re Mudderschprooch, vun dem Schiff, es unsre Voreldere do gebrocht hot, vun re Kaerrich, die haldet uns uff de rechte Paad, vun dem Blug, der hot uns uff em Land geholfe, vun unsre Kunscht, die gebt uns Zeit um scheene Dinge zu duhne, vun re Waage, die hot uns iwwer sell grosses Land genumme hot, die Farewe, rot, weiss un bloh, die weisse mir ass mir Amerikaaner sin, un die Keystone, die haldet uns Deitsche zamme fer Noochkummeschaft.

Nau sell iss glee bissel laenger ass die Amerikaanische Verschprechnis zu Faahne, awwer sell iss verdammt Mehningsvoll, gell?

So datt iss mei Argument ass mir unsere eegenes Land hawwe solle. Was denkt dihr? Ich weess ass es yuscht en Draam iss, awwer was fer en Draam! Ich bin arrig schtolz Deitsch zu sei, un ich bin aa arrig schtolz en Amerikaaner zu sei. So ich glaab mir solle en Schtick vun Amerikaa bleiwe, awwer unsere PA Deitschland misse in unsere Hatze bleiwe.