Guder Daag Blog Leser! Hanning iss der Munet vun Lieb wege Feldi nadierlich. Hallmark un all die annere Kaarde Kumpanis welle uns saage was Lieb iss, awwer mannichmol sin ihre Beschreiwunge net dief genunk. So was iss Lieb? Iss es yuscht en Gfiehl odder iss es meh? Ich lieb mei Fraa un mei Kinner, awwer gebt es meh zu Lieb? Ich denk so. Fer en echde gute Beschreiwung, dreh ich zu en Buch es net vun Hallmark gschriwwe iss: die Biewel. Der Paul hot en ganze Kabiddel iwwer Lieb in 1. Corinthians gschriwwe. Ich denk ass er es arrig gut beschriwwe hot. So, do iss en Iwwersetzung vun dem Paul sei Mehning vun Lieb aus em 13. Kabiddel vun 1. Corinthians:
Wann ich schwetz mit de Zunge vun Schtarbliche un vun Engle, awwer hab ken Lieb, bin ich en laermiche Gong odder en klingende Cymbal. Un wann ich brophetische Grefde hab, un verschteh alle Geheemnisse un all Wissenschaft, un ich hab all Glaawe, so ass ich die Barriye weckduh kennt, awwer hab ken Lieb, bin ich nix. Wann ich all mei Eigedum weckgeb, un wann ich mei Kaerper riwwergebt so ass ich bralle kennt, awwer hab ken Lieb, gewinn ich nix.
Lieb iss geduldich; Lieb iss liebreich; Lieb iss net neidisch odder groossmeilich odder arrogant odder grobb. Es verdreffendiert sich uff sei eegne Weg; es iss net aryerlich odder uffschtennich; es freet sich net in falsch duhe, awwer es freet sich in die Waahret. Es draagt all Dinge, glaabt all Dinge, hofft all Dinge, haldet all Dinge aus.
Lieb endt net. Awwer fer Bropheseie, sie waerre zu en End kumme; fer Zunge, sie waerre schtoppe; fer Wissenschaft, es waerre zu en End kumme. Ass ich en Kind waar, hab ich wie en Kind gschwetzt, hab wie en Kind gedenkt, hab wie en Kind verschtanne; ass ich en Uffgewaxener gewest waerr, hawwich en End zu kindische Wege geduh. Un nau Glaawe, Hoffning, un Lieb bleiwe, vun de Drei; un die greescht devun iss Lieb.
Was kann ich dezu saage? Ich glaab der Paul hot es gut genunk gsaat. Ich hoff ass all vun eich Lieb finne kenne, en Lieb die kummt vun meh ass Kaarde, Schokolaad, Blumme, un Bosse.
Do iss en Audio Klip:
PA Dutch 101 
Gude Schtick. Ich wollt fraage hossd net ee Schtori iwwer de Wilde Westen?
Hallo! Nee, bis nau hawwich net en Wilde Wescht Schtori gschriwwe, vielleicht soll ich iwwerdem.
Great. Sonds a little bit like the dialekt from the area where i am living
Great. Sonds a little bit like the dialekt from the area where i am living. Mir schwätze so ähnlich
Gott iss lieb.
Lieb isch, wemma Sache duut die fer annere gut sinn.
Grüße aus de Palz
Ich hoff ihr verschdehen mei deitsch, ich schreib so wie mein Groußvadder geredd hott.
Guder Daag Sascha, nadierlich kann ich die verschteh!
Des freut mich. Seit ich vunn dämm Film „hiwwe wie driwwe“ gehert hab bin ich ganz neigierig unn interessiert wie die pälzisch Schbrooch un Kultur in Amerika geredd un geläbt werd.
Sascha, sell freht mich! Viel Gschpass bei darrichsuche uff mei Website, Blog, un YouTube Channel! Mach’s gut aus Pennsylvaania!