Guder Daag Blog Leser! Gemehnichlich poscht ich yuscht Schticke die ich gschriwwe hab. Awwer ich weess ass es gebt so viel gude Schticke in Deitsch die schunn gschriwwe gewest sin. So des Woch will ich zwee arrig gude Schticke iwwer Yenner mit eich deele. Die aerschde iss vun dem H. A. Shuler die im Yaahr 1905 gschriwwe waar un die zwette iss vun dem gut bekannte deitsche Schreiwer: der John Birmelin. Viel Gschpass bei lese!
“Mer hen unser alder Schulmeeschder gfroogt, ferwas der Munet Yenner heesst. Selli alde Reemer, secht, er, sin schuld draa. Sie hen en Yanuarius gheesse nooch em Yanus, wu
ihre Zeitgott waar. Den hen sie abgemolt mit me dobbelde Gsicht; en frisches, yunges wu vaersich guckt in die Zukunft, un en aldes, runsliches, wu hinnersich guckt in die Vergangeheet. Ee Wusch Haar hot er vanne uff em Kopp: ‘s iwwerich iss all blott. Sell guckt gschpassich, awwer es schteckt en diefi Mehning datt drin. ‘S mehnt ass mer die Zeit graad vanne am Schopp fascht griege soll un yo net waarde, bis sie verbei iss, fer vun hinne kann mer ken Halt griege.” – H. A. Shuler, 1905
Der Yenner – der John Birmelin
Nau hen mir die neie Kalenner
un sin aa schunn widder im Yenner;
Den hasse die Alde
Yuscht weege dem kalde,
Sie mehne der Summer waer scheener.
Doch guck mol, die Schneeflocke falle!
Geglingel vun Belle muss schalle!
Es glitzert so weiss
Mit Schnee un mit Eis,
Un heer emol, Beitsche, die gnalle!
Ya, Schliddebaah muss emol sei,
Un alles im Schlidde zu nei!
Die Buwe un Maed,
Die sin yo net bleed,
Die Alde sin yo net dabei.
Do iss en Audio Klip:
PA Dutch 101 
Dank Dough, guude Wadde. Ebbes zu denge, yuscht fer de Yenner.