2019!

Guder Daag Blog Leser un willkumm im Yaahr 2019 odder ass die Roman Leit saage daete: MMXIX. Well, nau sin mir widder in en Neies Yaahr. Viel iss in 2018 gschehe un ich weess as viel in 2019 aa gschehe waerre. Was waerre gschehe iss nooch in die Luft. Fer mei aerschde Blog Poscht fer es Yaahr hawwich gedenkt ass ich en katze Lischt vun wichdige Yaehrlichfeschte fer es Yaahr 2019 gewwe waerrd.

500. Yaehrlichsfescht: 1519 Leonardo da Vinci, der gut bekannte Kunschtler iss gschtarewe.

250. Yaehrlichsfescht: 1769 – der David Rittenhouse hot en Observatory un en Schpekdief in Philadelphia gebaut. Er hot die Transit vun Venus abgsaerft.

200. Yaehrlichsfescht: 1819 – Spain hot Florida zu de USA gewwe. Nau denk mol, sell waar wichdig! Mitaus Florida gebt es ken Disney World!

150. Yaehrlichsfescht: 1869 – der 15. Amendment zu dem Constitution iss gschtimmt. Der hot gsaat: Die Recht zu Schtimme soll net verleegelt odder verkatzt wege Rasse, Fareb, odder frieher Umschtand vun Servitude. Aa der aerschde Transcontinental Riggelweg waar in Promontory Point, Utah, mit en goldene Schpeik vollendet.

100. Yaehrlichsfescht: 1919 – der 18. Amendment zu dem Constitution iss gschtimmt. Der hot gsaat: Unerlaabt iss die Mache, Import, odder Export vun Alcoholische Gedrenke. Aa Der aerschde Welt Grieg iss endlich zu en End kumme.

50. Yaerhlichsfescht: 1969 – der Kurt Vonnegut hot een vun mei Libeschtbicher gschriwwe: Slaughterhouse Five. Der Neil Armstrong iss uff der Muund gelandet. Es Woodstock Myusick un Kunscht Fescht waar in Bethel, NY un meh ass 400,000 Leit waare datt!

Ich weess net was in des Yaahr gschehe waerr awwer ich hoff ass es Yaahr eich viel Glick, Gsundheit, un Gedeiheit bringt!

Do iss en Audio Klip: