Grischtdaag un Nei Yaahr 2019!

Do iss en Link zu mei Video Gschwetzt un unnich iss was ich gsaat hab!

Grischtdaag un Nei Yaahr 2019 Video

Guder Daag liewe Blog Leser un Leit in YouTube Land! Well es Yaahr iss widder rum un es iss Zeit fer mich en Grischtdaag un Nei Yaahr Video zu mache. Es fiehlt sich as ich letschdem Yaahr sei Video graad gemacht hab, awwer nee, zwelf Munet sin schunn vorbeigange.

So loss mich mit en katze Rickguck uff ee paar Dinge aafange, die im Yaahr 2018 gschehe sin. 2018 kann es “Nasses Yaahr” gheese, weil mir do in Pennsylvaania meh as 70 Zoll Rege ghatt hen!

In Hanning, der Punxsatawny Phil die Grundsau hot sei Schadde gsehne…6 Woch meh Winder! Die Winder Olympic Schpiele sin in Sudd Korea gschpielt. Es hot widder en Schul Schiesserei gewwe. Des Mol waar es in Florida un 17 Leit sin gschtarewe. Sell iss en Druwwel as mir noch net en Antwatt dafer hen.

In Matz der Vladimir Putin waar zum 4. Mol neigschtimmt ass Bresident vun Russland. Aye aye aye, wie lang waerr er an die Macht bleiwe? Die letschde weisse Rhinocerous iss gschtarewe un nau sin sie extinct.

In Moi der Keenichsoh vun England, der Harry hot die Meghan Markle (en Deitsches Maedel) gheiert. Millyonen vun Leit hen es im Guckbax gsehne. Un ich muss ehrlich saage, ich hab aa geguckt, awwer net gebrillt.

In Tschunn der Bresident Trump hot der Kim Jong-Un vun Nadd Korea gedroffe zum aersche Mol. Die Versommling waar in Singapore un Nadd Korea hot gsaat ass sie ihre Nuclear Weapons Brogramm schtoppe waerr. Mol sehne wie sell weiter geht. Die World Cup waar in Russland gschpielt un Frankreich hot gewunne. Endlich, Weibsleit waare erlaabt Maschiene in Saudi Arabia zu faahre.

In Oktower der Journalist, Jamal Khashoggi, waar gemaerdt. Viel Leit denke ass der Gron-Keenichsoh vun Saudia Arabia es befohle hot. In Pittsburgh sin en Schiesserei in die Tree of Life Synagog gschehe. 11 Paersons sin gschtarewe.

Viel bekannte un wichtige Leit sin im 2018 gschtarewe: Billy Graham, Stephen Hawking, Barbara un George Bush, Anthony Bourdain, Aretha Franklin, John McCain,  Neil Simon, Burt Reynolds, Stan Lee, .

Fer ich un mei Familye, 2018 waar en gudes Yaahr. Mei Kinner sin gewaxe un mei Dochder schwetzt meh Deitsch yeder Daag. Die Estella iss nau in 1st Grade, nau kann sie Deitsch zu ihre neie Freinde laerne!  Aa des Yaahr waar ich arrig schaffig mit zwee Filmmacher aus Deitschland. Hiwwe wie Driwwe die Documentary iss nau “in the can” un faddich. Es waerrd sei Premier in Deitschland in Abrill 2019 gewwe un in Tschunn in Amerikaa. Ich waerr meh Information uff mei Website gewwe, wann ich eppes Neies weess. Ich hab aa en neies Buch geduh. Des Mol hawwich widder mit der Rachel Yoder zammegschafft. “Davey Applebutter” iss en Buch fer Kinner un aa fer Uffgewaxener. ‘Sis in Deitsch un in Englisch. Der Leser geht mit dem Davey uff en Rees zu seim Grossdaadi sei Bauerei.

So nau iss die Zeit wann mer uff en abaddiches Bobbli denke. Grischtdaag iss viel meh as Gschenke, Beem mit Lichter, grosse Iems un scheene Lieder. Fer uns Grischtliche Leit, iss es en neie Aafang un der Aakumme vun unserem Herr. Unser Herr, der kummt um all unser Sinde wegzunemme.

Mei Winsche fer eich des Yaahr sin as mir do in re Welt Fried finne kennte, as Leit die ken Haus hen, en Blatz finne kennte, as die Leit die mitaus Arewet sin, en gude Tschopp finne kennte, as die Leit die grank sin, en Antwatt zu ihre Druwwel finne kennte. As die Lenner in re Welt die in Grieg sin, en ewige Fried finne kennte. Ich weess schunn as der Belschnickel net all mei Winsche vollende kennt. Awwer ich froog ihn ennihau.

Paersehnlich, will ich glee bissel meh saage. Sell kummt graad vun meinem Hatz: Ich bin so froh fer all die Unnerschtitzung as all mei Blog Leser, Facebook Freinde un annere Internet Freinde mich im Yaahr 2018 gewwe hen. Nadierlich waerr ich im 2019 widder neie Blog Poschts schreiwe un Videos mache. Nadierlich waerr ich so viel duhe as meeglich fer unsere scheene Schprooch zu behalde. Ich hoff as all vun eich mir mithelft.

Awwer fer nau saag ich eefach: Hallicher Grischtdaag un ich winsch eich en halliches, glickliches un gsundliches Nei Yaahr 2019. Bis Yenner, macht’s gut un schwetzt Deitsch.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this:
search previous next tag category expand menu location phone mail time cart zoom edit close